समाचारहरू

बन्दको अवज्ञा गरेको भन्दै नेत्रविक्रम चन्द नेतृत्वको नेपाल कम्युनिष्ट पार्टीका कार्यकर्ताले कतै बम विष्फोट गराएका छन् त कतै सवारी साधनमा तोडफोड गरेका छन् ।

इन्सेक चितवन जिल्ला प्रतिनिधि दिपेन्द्र अधिकारीका अनुसार असार २७ गते बिहान चितवन खैरहनीमा सो पार्टीका कार्यकर्ताले यात्रुबाहक बसमा तोडफोड गरेको छन् । तोडफोडबाट बसमा क्षति पुगेको प्रहरीले जनाएको छ ।

सर्लाहीको बरहथवाबाट काठमाडौँतर्फजाँदै गरेको ना ६ ख १०८५ नम्बरको बसमा बिहान पौने तीन बजे स्कुटरमा चढेर आएका सो पार्टीका कार्याकर्ताले ढुङ्गामुढा गरेको जिल्ला प्रहरी कार्यालयका एसपी दिपक थापाले बताए ।

इन्सेक रुपन्देही जिल्ला प्रतिनिधि रिमा विसीका अनुसार नेपाल कम्युनिष्ट पार्टीले बन्द आह्वान गरेको अघिल्लो दिन असार २६ गते राति बुटवलको मिलनचोकमा बम बिष्फोट भएको छ । सानो बाल्टिनमा राखिएको विष्फोटक पदार्थ विष्फोट भएपनि मानवीय तथा भौतिक क्षति भने नभएको जिल्ला प्रहरी कार्यालयका डिएसपी बेलबहादुर पाण्डेले बताए ।

इन्सेक जुम्ला प्रतिनिधि मानदत्त रावलका अनुसार अज्ञात समूहले मालबहाक गाडी आगजनी गरेको छ । नेपालगञ्जदेखि जुम्लाका लागि मालसामान ल्याउँदै गरेको ना ७ ख ४६०२ नम्बरको मालबहाक गाडीमा आगजनी गरेको हो ।

चन्दननाथ नगरपालिका-६ स्थित हस्पिटल रोडमा मालसामान अनलोड गरिरहेको अवस्थामा अज्ञात समूहले गाडीको क्याविन भित्र पेट्रोल छर्केर आगजनी गरेको सवारी चालक प्रविन बिकले बताए । उनले भने-'गाडी पार्किङ गरेर पछाडिबाट सामान अनलोड गर्दै गर्दा अगाडि क्याविनमा पेट्रोल छर्केर आगजनी गरेर भाग्न लागेको अवस्थामा थाहा भयो ।'

जिल्ला प्रहरी कार्यालयका डिएसपी गुरुविष्णु काफ्लेका अनुसार घटनाको मुचुल्का भएको छ भने गाडीमा कसले आगजनी गरेको हो अनुसन्धान सुरु गरिएको छ ।

नेपाल कम्युनिष्ट पार्टीका भेरी कर्णाली इर्ञ्चाज चन्द्रविर तिरुवाले बन्दको समयमा आफूहरूले मालबहाक गाडीमा आगजनी नगरेको बताए ।

इन्सेक कपिलवस्तु जिल्ला प्रतिनिधि नन्दराम पौडेलका अनुसार असार २७ गते पूर्वपश्चिम राजमार्गको चन्द्रौटादेखि पश्चिम बनकासावासामा अज्ञात समूहले चलिरहेको बसमाथि दिउँसो ४ बजे पेट्रोलबम प्रहार गर्दा बसमा सवार एकजना यात्रु घाइते हुनुका साथै बसमा क्षति पुगेको छ ।

ना ५ ख ८९४८ नं को बसमा जङ्गल माथिबाट अज्ञात समूहले फ्याँकेको पेट्रोल बम विष्फोट हुँदा बसमा सवार बाँके जिल्ला मौनामपुरका ५६ वर्षीय कमरुद्धिन ज्वोहार गम्भीर घाइते भएका छन् । घाइतेको प्राथमिक उपचारको लागि शिवराज अस्पतालमा लगिएकोमा थप उपचारका लागि लुम्बिनी अञ्चल अस्पताल बुटवल 'रिफर' गरिएको जिल्ला प्रहरी कार्यालयका एसपी भोजजङ्ग शाहले जानकारी दिएका छन् ।

बसको पछाडि सिटमा बसेका घाइते ज्वोहारको टाउको, कान र हातमा चोट लागेको प्रहरीले जानकारी जनाएको छ । बसको पछाडिको भागमा सिसा फुटेको प्रहरीको भनाइ छ ।

अनलाइन डेस्क