समाचारहरू

बाँसगढी नपा-५ बाँसगढी बजारमा बेवारिसे अवस्थामा भेटिएको प्रेसर कुकर बम असार १२ गते नेपाली सेनाको टोलीले निष्कृय बनाएको छ ।

अज्ञात समूहले राखेको विष्फोटक पदार्थ नेपालगञ्जस्थित चारबाहिनीबाट आएको नेपाली सेनाको टोलीले असार १२ गते दिउँसो २ बजे निष्कृय बनाएको हो ।

असार १२ गते बिहान बेवारिसे अवस्थामा भेटिएको विष्फोटक पदार्थ प्रेसर कुकर रहेको र त्यसमा बारुद र माटो मिसाएर भरेको अवस्थामा फेला परेको जिल्ला प्रहरी कार्यालय बर्दियाका एसपी भरतबहादुर बोहोरा जानकारी दिए । स्थानीय निर्वाचनको मौन अवधि सुरु भए लगत्तै जिल्लामा सुरक्षा अवस्थाको जोखिम बढेको जनाइएको छ ।

त्यसैगरी गुलरिया नपा-४ तुलापुरमा असार ११ गते राति १२ बजे नेपाली काङ्ग्रेस र नेकपा एमालेका कार्यकर्ताबिच केही समय विवाद भएको थियो ।

बारबर्दियाको हर्नहवामा एमाले र माओवादी कार्यकर्ताबिच असार ११ गते राति झडप हुन खोजेपछि प्रहरी तत्काल पुगेर स्थिति सामान्य बनाएको प्रहरीले जनाएको छ ।

मानबहादुर चौधरी