समाचारहरू

तिलोत्तमा नगरपालिका–१६ बिहुलीका नेकपा एमालेका कार्यकर्ताहरू २८ वर्षीय सन्जीव भण्डारी र  २६ वर्षीय सागर रेग्मीमाथि नेपाली कांग्रेसका कार्यकर्ताहरूले वैशाख २६ गते कुटपिट गरेको छ ।

तिलोत्तमा नपा–१६ का २६ वर्षीय सन्जीव भुसाल, २९ वर्षीय प्रविन खड्का, ३५ वर्षीय इश्वर केसी, ३५ वर्षीय लक्ष्मण राना र ३२ वर्षीय मोहन चौधरी लगायत ७÷८ जनाको समूहले कुटपिट गरेको पीडितले बताउनु भयो ।

कुटपिटबाट भण्डारीको कान, छाती र टाउकोमा चोट लागेको छ भने रेग्मीको अवस्था सामान्य रहेको छ । घाइते भण्डारीको क्रिमसन अस्पताल मणिग्राममा उपचार  गरिएको छ ।

आरोपित  भुसाल वडा नं. १६ मा नेपाली कांग्रेसबाट वडा अध्यक्षमा उम्मेदवार झविलाल भुसालका छोरा रहेको पीडितले इन्सेक प्रतिनिधिसँगको फोन सम्पर्कमा बताउनु भयो ।

पीडितका ठूलो बुबा ओम प्रकाश रेग्मीका अनुसार बिरामी भेटेर राती घर आउदै गरेको अवस्थामा समूहमा रहेका नेपाली कांग्रेसका कार्यकर्ताले चितवनबाट नेकपा एमालेलाई जिताउन आएको भन्दै कुटपिट गरेको बताउनु भयो ।

नेकपा एमाले तिलोत्तमा नगरपालिकाका निर्वाचन परिचालन कमिटीका संयोजक वासुदेव घिमिरेले पराजयको डरले नेपाली कांग्रेसका कार्यकर्ता आक्रमणमा उत्रिन थालेकाले दोषीलाई गिरफ्तार गरी कारबाही गर्न स्थानीय प्रशासनलाई आग्रह गर्नुभयो ।

इलाका प्रहरी कार्यालय मंगलापुरका सइ लक्ष्मण डाँगीले घटनाका विषयमा अनुसन्धान भइरहेको बताउदै प्रहरी चौकीमा उजुरी लिन नमिल्ने भएकाले उजुरीका लागि बुटवल जान आग्रह गरिएको बताउनु भयो ।

घटनाका विषयमा इलाका प्रहरी कार्यालय बुटवलका इन्सपेक्टर प्रकाश खत्रीले घटनाको  अनुसन्धान भइरहेको बताउनु भयो ।

नेपाली कांग्रेस जिल्ला अध्यक्ष रामकृष्ण खाँडसँग घटनाको बारेमा बुझ्न खोज्दा सम्पर्क हुन सकेन ।

रीमा बिसी