समाचारहरू

नेपालगञ्जको भेरी अस्पतालमा बिरामीहरूको अवस्थाबारे स्थलगत समाचार सङ्कलन गर्न जानुभएका जी नेपाल एच.डी.फोरके टेलीभिजनका पत्रकार अभिषेक गुप्तामाथि खुकुरी नेपाल सेक्युरिटी कम्पनीका सुरक्षागार्डले अस्पतालको गेटमा रोकी क्यामारा खोसेर ०८० चैत १ गते दुर्व्यवहार गरेको छ ।

नेपाल प्रेस युनियन, बाँकेले प्रेस विज्ञप्ति जारी गर्दै अस्पतालको आई.सी.यु प्रयोगशाला स्थल जस्तो संवेदनशील ठाउँमा रिपोर्टिङ गर्दा स्वाभाविक रूपमा संवेदनशील हुनुपर्छ भन्दै अस्पताल बाहिरको दृश्य खिच्नमा समेत रोक लगाउँदै पत्रकारमाथि दुर्व्यवहार दुखद कुरा भएको नेपाल प्रेस युनियनका सचिव भीष्म लोधको प्रेस विज्ञप्ति मार्फत उल्लेख गर्नुभएको छ ।

यस्ता घटना दोहरिन नदिन र पत्रकारलाई निर्वाध रूपमा समाचार सङ्कलन गर्ने वातावरण बनाउन अस्पताल प्रशासनको ध्यानाकर्षण गराएको छ । महासङ्घ पत्रकारको संविधान प्रदत अधिकारमा आघात पुर्‍याउने यस्ता हर्कतको कडा शब्दमा भत्र्सना गर्दै पत्रकार गुप्तामाथि गरिएको दुर्व्यवहार भएको उल्लेख छ । पत्रकारको परिचय पत्र देखाउँदा पनि नमानेर पत्रकारको दुर्व्यवहार गर्ने सुरक्षागार्डमाथि अस्पताल प्रशासनले छानबिन गरी कारबाही समेत गर्न माग गरेको छ ।

नेपाल पत्रकार महासङ्घ, बाँकेका सचिव कमल डाँगीले प्रेस विज्ञप्ति मार्फत गुप्तामाथि समाचार सङ्कलन गर्ने क्रममा अवरोध एवम् अङ्कुश लगाउने नियतले भेरी अस्पतालले सार्वजनिक गरेको सुचना प्रति नेपाल पत्रकार महासङ्घ, बाँके शाखाको गम्भीर ध्यानाकर्षण भएको जनाएको छ ।

भेरी अस्पतालका सूचना अधिकारी डा. सङ्केत कुमार रिसालले सामाजिक सञ्जाल मार्फत सूचना सार्वजनिक गर्दै अस्पताल संवेदनशील क्षेत्र भएकाले भेरी अस्पतालभित्र कुनै पनि भिडियो फोटो तथा समाचार सङ्कलन कार्य गर्नु गराउनु परेमा यस कार्यालयको सूचना अधिकारीसँग समन्वय गर्नुहुन अनुरोध गर्नुभएको थियो ।

ध्रुब राज शर्मा