नेकपाका कार्यकर्ताद्वारा ज्येष्ठ नागरिकमाथि कुटपिट

 

सिद्धलेक गाउँपालिका–५ का ६४ वर्षीय बुद्धिमान श्रेष्ठलाई वैशाख २२ गते घर नजिकै कुखुराको खोरमा कुखुरालाई दाना खुवाउने क्रममा नेत्रविक्रम चन्द (विप्लव) नेतृत्वको नेपाल कम्युनिष्ट पार्टीका कार्यकर्ताले रड र खुँडा प्रहार गरी घाइते पारेका छन् ।

आफ्नो पार्टी कार्यकर्तालाई कुटपिट गरेको भन्दै समूहमा आएका नेकपाका कार्यकर्ताले श्रेष्ठलाई टाउकोमा रड प्रहार गरी घाइते बनाएका हुन् ।

श्रेष्ठलाई कुटपिट गरी घाइते पारेपछि नेकपाका कार्यकर्ता भागेको र घाइते श्रेष्ठलाई गाउँबासीको सहयोगमा उद्धार गरी २२ गते नै काठमाडौँस्थित ट्रमा सेन्टरमा लागी उपचार भइरहेको जिल्ला प्रहरी कार्यालयका डिएसपी प्रकाश विष्टले जानाकारी दिए ।

कुटपिटपछि फरार रहेका नेकपा कार्यकर्ताहरूको खोजी कार्य भइरहेको प्रहरीले जनाएको छ । पीडित परिवारको तर्फबाट जिल्ला प्रहरी कार्यालयमा अहिलेसम्म उजुरी नपरेको प्रहरीले जनाएको छ ।


सीताराम अधिकारी