समाचारहरू

बेंसीशहरमा रहेको जिल्ला सामुदायिक अस्पतालले नेपाल सरकारले निशुल्क प्रदान गर्ने भनेका औषधिहरू शुल्क लिएर विक्री गरेपछि सेवाग्राही मर्कामा परेका छन् ।

निशुल्क पाइने औषाधिहरू अस्पतालले शुल्क लिएर विक्री गरेका कारण सेवाग्राही आक्रोशित बनेपछि अस्पताल विवादित बनेको छ । सोमबार औषधि लिन गएका चिती-५ का बेदराज खनियाले 'सेपट्याक्जन सुइ' निशुल्क प्रदान गरिने भनी अस्पतालको बडापत्रमा उल्लेख गरेपनि अस्पतालमा आफूले शुल्क तिर्नु परेको आरोप लगाए ।

त्यस्तै बेंसीशहर-९ की सीता सुनारले पनि गर्भवतीले खाने 'फेलोक एसिड' नामको औषधिसमेत निशुल्क दिनुपर्नेमा शुल्क लिएको आरोप लगाइन् ।

अस्पतालका लेखा अधिकृत अरूण राईले औषधि वितरण केन्द्रमा बस्ने कर्मचारीहरूको गल्तीको कारण शुल्क लिइएको स्वीकारेका छन् । राईले आगामी दिनमा त्यस्तो गल्ती गर्नेविरूद्ध अस्पताल प्रशासनले कारबाही गर्ने बताए ।

अस्पतालका कर्मचारीले नियतबस शुल्क लिएको पाइएमा आवश्यक छानबिन गरी दोषीलाई कारबाही गर्ने वरिष्ठ जनस्वास्थ्य अधिकृत दुर्गादत्त चापागाईंले बताए ।

दलबहादुर मजाकोटी