समाचारहरू

प्रमुख निर्वाचन आयुक्त डा. अयोधीप्रसाद यादवले आसन्न स्थानीय तह निर्वाचन सम्पन्न गर्ने गन्तव्यसम्म आयोग पुगिसकेकाले निर्वाचन हुनेमा अब कुनै दुविधा नरहेको बताएका छन् ।

राष्ट्रिय सञ्चारमाध्यम (छापा र अनलाइन) का सम्पादकसँगको ललितपुरमा वैशाख ५ गते भएको अन्तरक्रियामा उनले निर्वाचनका लागि आवश्यक मतपत्र, मतदाता नामावली र मतदाता परिचयपत्रको छपाइ लगभग सकिसकेको र मतपेटिकालगायतका निर्वाचन सामग्रीको जिल्ला जिल्लामा ढुवानी भइरहेको जानकारी दिँदै निर्वाचन हुनेमा अब कुनै शङ्का नरहेको बताएको राससले जनाएको छ ।

प्रमुख निर्वाचन आयुक्त डा यादवले भने-“लोकतन्त्रमा दलीय सहमति वा असहमति हुनु स्वाभाविक हो । आयोगले सावधानीपूर्वक काम गरिरहेको छ । दलहरू निर्वाचनबारे अर्को सहमति गरेर अघि बढे पनि आयोगलाई मान्य हुने छैन ।”

“निर्वाचन जनताको हातमा हुन्छ । मतदाताको हातमा हुन्छ । खेलाडी राजनीतिक दलहरू हुन् । निर्वाचन आयोगले निर्वाचनको व्यवस्थापन मात्रै गर्ने हो ।” -उनले भने ।

निर्वाचनको व्यवस्थापन र तयारीमा आयोग निकै अघि बढिसकेकाले असन्तुष्ट पक्षको माग सम्बोधन गर्न अब अध्यादेश वा विधेयक आउन नसक्ने उनको भनाइ थियो ।

यस पटकको निर्वाचनमा मतदान ८० प्रतिशत भन्दा बढी पुर्‍याउने र बदर मत २ प्रतिशतमा झार्ने लक्ष्य आयोगले राखेको उनले जानकारी दिए ।

उनले निर्वाचनका लागि अनुकूल वातावरण बनाउन सञ्चारमाध्यमले प्रशंसनीय भूमिका खेलेको र त्यो आगामी दिनमा पनि जारी रहने विश्वास व्यक्त गरे ।

निर्वाचन आयोगका सचिव गोपीनाथ मैनालीले निर्वाचनको वातावरण बनाउन र स्वच्छ, निष्पक्ष र स्वतन्त्र निर्वाचनका लागि आचारसंहिताको पालना गराउन सञ्चारमाध्यमले गर्दै आएको काम अतुलनीय रहेको बताए ।

अनलाइन डेस्क