समाचारहरू

यही वैशाख ३० गते हुने स्थानीय तहको निर्वाचन सम्पन्न गर्नका लागि जिल्लाका आठ ओटा स्थानीय तहमा आवश्यक सामग्री सहित ४ सय ९६ जना कर्मचारी परिचालन गरिएको छ । जिल्लाका आठ ओटा स्थानीय तहका ७९ मतदान स्थलका १ सय २ मतदान केन्द्रमा ४ सय ९६ जना कर्मचारी खटाइएका हुन् ।

मतपेटिका र निर्वाचनका सामग्री मतदान स्थलमा पु¥याईदै छ । मतदान केन्द्रमा खटिएका कर्मचारी र सुरक्षाकर्मी मतपेटिका र निर्वाचनका सामग्रीसहित मतदान स्थलमा गएका हुन । मतदान अधिकृत र सहायक मतदान अधिकृतसहितका कर्मचारी सामग्री बोकेर मतदान स्थलतर्फ निस्केका छन् ।

स्थानीय तहको निर्वाचनका लागि २ सय ४ जना मतदान अधिकृत र सहायक मतदान अधिकृतसहित कर्मचारी खटिएका छन् । मुख्य निर्वाचन अधिकृतको कार्यालयका अनुसार जिल्लाका १ सय २ मतदान केन्द्रमा मतदान अधिकृत, सहायक मतदान अधिकृतसहित ४ सय ९६ कर्मचारी खटिएका छन् ।

मुख्य निर्वाचन अधिकृतको कार्यालयका सहायक निर्वाचन अधिकृत तोयानाथ उपाध्यायका अनुसार जिल्लाका ७९ मतदान स्थलका १ सय २ मतदान केन्द्रमा खटिने कर्मचारी समेत छनौट गरिएको छ । मतदान अधिकृतमा ६ जना महिला अधिकृत खटिएकी छन् ।
पाँच सय भन्दा माथि मतदाता भएका मतदान केन्द्रमा पाँच जना र पाँचसय भन्दा कम मतदाता भएका केन्द्रमा चार जना कर्मचारी खटाएको उहाँले बताउनु भयो ।

जिल्ला निर्वाचन अधिकारी महेश शर्माका अनुसार जिल्लामा ८८ मतदान केन्द्र पाँच सय भन्दा बढी मतदाता र १४ वटा मतदान केन्द्रमा पाँच सय भन्दा कम मतदाता छन् । सोही मापदण्ड अनुसार जिल्लामा कर्मचारी परिचालन गरिएको हो । प्रत्येक केन्द्रमा कर्मचारी सहित तीन जना स्वयंसेवक खटिएका छन् । त्यसको जिम्मेवारी मतदान अधिकृतकै हुनेछ ।

निर्वाचन अधिकृतको कार्यालयमा सिसि टिभि जडान
जुम्लाका सबै निर्वाचन अधिकृतको कार्यालयमा सिसिटिभि जडान गरिएको छ । मतगणना सुरक्षित तवरले सम्पन्न गर्नका लागि सिसि क्यामरा जडान गरिएको हो । प्रमुख जिल्ला अधिकारी बिजय कुमारी प्रसाईका अनुसार आठ ओटा स्थानीय तहका निर्वाचन अधिकृतको कार्यालयमा सिसि क्यामरा जडान गर्न यस अघिनै निर्देशन गरिएको थियो । उहाँले भन्नुभयो जडान भईसकेको छ ।

त्यस्तै विगतको निर्वाचनमा टेलिफोन नै नलाग्ने स्थानीय तहमा यस पटक सिसि क्यामरा समेत जडान गरिने भएको छ । प्रजिअ प्रसाईका अनुसार केन्द्रीय निर्देशन अनुसार नै जुम्लाका सबै स्थानीय तहलाई निर्वाचन अधिकृतको कार्यालयमा सिसि क्यामरा जडान गर्न निर्देशन गरिएको थियो ।

विगतमा केही स्थानीय तहमा धाधली र झगडा भएका थिए । सिसिटिभि जडान गरेको खण्डमा सुरक्षाको दृष्टिले सहज हुने भएको छ । सिसि क्यामराले निर्वाचन अधिकृतको कार्यालय वा मतगणना स्थलमा थप सुरक्षित हुने अपेक्षा गरिएको छ । सिसि क्यमराले केही समस्या भईहालेमा प्रमाणको रुपमा हेर्न सकिने भएकाले यस्तो कार्यको थालनी गरिएको प्रमुख जिल्ला अधिकारी प्रसाईले बताउनु भयो ।

१ हजार ७ सय २१ सुरक्षाकर्मी खटिए
स्थानीय तहको निर्वाचनका लागि जुम्लामा एक हजार ७ सय २१ सुरक्षाकर्मी खटाइएको छ । शान्ति सुरक्षा बजमुद बनाउने र निर्वाचन धाँधलीमुक्तसहित भयरहित वातावरणमा सम्पन्न गर्नका लागि आवश्यक सुरक्षाकर्मी परिचालन गरेको हो । नेपाल प्रहरी ४ सय ३२ जना, नेपाली सेना ३ सय ५० जना, सशस्त्र प्रहरी २ सय ७० जना र म्यादी प्रहरी ६ सय ६९ जना परिचालन गरिएको डीएसपी नरेन्द्र चन्दले बताउनु भयो ।

सुरक्षा टोलीले अहिले मतदान स्थल र मतदान केन्द्रको सूचना सङ्कलनदेखि स्थलगत निरीक्षणको काम गरिरहेको डिएसपी चन्दले बताउनु भयो ।

उहाँले भन्नुभयो ‘निर्वाचन गतिविधि सुरु भएको क्षेत्रमा आवश्यक सुरक्षाको जनशक्ति खटाइएको छ । निर्वाचन सुरक्षाको पहिलो घेरामा नेपाल प्रहरी, दोस्रोमा सशस्त्र र तेस्रो घेरामा नेपाली सेना रहने छ । निर्वाचनको सुरक्षा चुनौती आकलन गर्दै चारैवटा सुरक्षा निकायले आ–आफ्नो तयारी तीव्र पारेका छन् ।

नन्दबक्स गणका गणपति रबिन थापाले जुम्लाका आठ वटै स्थानीय तहमा नेपाली सेना परिचालन भएको बताउनु भयो । उहाँले निर्वाचन स्वच्छ, निष्पक्ष र धाँधलीरहित बनाउने जिम्मेवारी सबैको भएकाले सेनाले सुरक्षाको लागि कुनै पनि कसर बाँकी नराखी कार्य गर्ने बताउनु भयो ।
सशस्त्र प्रहरी बल नम्वर ३३ गण जुम्लाका एसपी चित्रङ्गत दाहालले निर्वाचनमा आउन सक्ने चुनौती चिर्दै शान्तिपूर्ण रुपमा सम्पन्न गराउने विषयमा जिल्ला स्थित सबै सुरक्षा निकाय योजनाबद्ध तरिकाले लागेको बताउनु भयो । उहाँले भन्नुभयो, ‘मतदातालाई शान्तिपूर्ण र भयरहित वातावरणमा मतदान गर्ने वातावरण तयार पार्ने गरी सुरक्षा रणनीति बनाइएको छ ।

त्यस्तै निर्वाचन निष्पक्ष, भयरहित र शान्तिपूर्ण रुपमा सम्पन्न गराउन एकीकृत तथा छुट्टाछुट्टै रणनीतिक सुरक्षा योजना निर्माण गरी संयन्त्र परिचालन गरिएको छ । केही सुरक्षाको जनशक्तिलाई तयारी अवस्थामा राखिएको प्रमुख जिल्ला अधिकारी बिजया कुमारी प्रसाइले बताउनु भयो । उहाँले भन्नुभयो मर्यादित निर्वाचनको महत्वपूर्ण शर्त नै शान्तिपूर्ण वातावरण सिर्जना गर्नु हो । ्त्यसैले सुरक्षा संयन्त्रले विगतका अनुभव र वर्तमान अवस्थाको आधारलाई समेत विश्लेषण गरेर सुरक्षा रणनीति निर्माण गरेको छ ।

निर्वाचनको सबै सुरक्षा नेपाल प्रहरीको जिम्मामा हुने र उसको सहयोगी शक्तिका रुपमा सशस्त्र प्रहरी र नेपाली सेना तथा राष्ट्रिय अनुसन्धान विभागले समेत काम गर्ने बताइएको छ । तर जुम्लामा केही भौगोलिक हिसावले बिकट स्थानमा रहेका मतदान स्थललाई लक्षित गरी चुनावमा हुन सक्ने राजनीति दलको प्रतिष्पर्धा र झडप लगायत चुनौती हुनसक्ने, आकलन गरेर जुम्लाको सुरक्षा संयन्त्रले योजना बनाएको जिल्ला प्रशासन कार्यालय जुम्लाले जनाएको छ ।

 

मानदत्त रावल