समाचारहरू

राष्ट्रिय मानव अधिकार आयोगका माननीय सदस्य गोविन्द प्रसाद शर्मा पौडेलले निर्वाचन शिक्षा प्रभावकारी नभएको बताएका छन् । प्रदेश सभा र प्रतिनिधि सभाको निर्वाचनको अनुगमनका क्रममा मङ्सिर २० गते रुपन्देहीमा आएका पौडेलले मानव अधिकारकर्मी, पत्रकार र पर्यवेक्षकहरुसँग सो कुरा बताएका हुन् ।

उनले निर्वाचनमा ५२ वटा संस्थाका ४२ हजार बढी पर्यवेक्षकहरुले निर्वाचन अनुगमन तथा पर्यवेक्षण गर्ने गरेको भए पनि शहरी क्षेत्र, मुख्य राजमार्ग लगायतका क्षेत्रमा मात्र पर्यवेक्षक घुइँचो लाग्ने र ग्रामीण क्षेत्रमा पर्यवेक्षक जान नखोज्दा समस्या देखिएको बताए । सदस्य पौडेलले निर्वाचन आयोगले बनाएको आचार संहिता स्वयम् आफैले कति पालना गरेको छ र सरकारले कति पालना गरेको छ, राजनीतिक दलहरुले कति पालना गरेका छन्, त्यसको पनि अनुगमन गर्नुपर्ने अवस्था रहेको बताए ।  उनले सरकारले निर्वाचन आचार संहिता लागु गरेलगत्तै प्रमुख जिल्ला अधिकारीहरुको सरुवा, डिआईजीको नियुक्ति जस्ता कुरा गर्न हुन्थ्यो की हुदैन्थ्यो र सरकारले शंकाकै भरमा गिरफ्तार गरेर सार्वजनिक अपराध मुद्दा चलाउने र राजनीतिक दलहरुले मौन अवधिलाई मनी अवधिमा प्रयोग गरेको बताए ।

पौडेलले मतदाताले स्वच्छ, निष्पक्ष र भयरहित वातावरणमा मतदान गर्न पाउने अधिकारको सुनिश्चित गरिनु पर्ने तथा महिलामैत्री,जेष्ठ नागरिकमैत्री, अपाङ्गमैत्री र तेस्रो लिङ्गीमैत्री मतदान स्थल हुनुपर्ने पनि उल्लेख गरेका छन् ।

कार्यक्रममा मानव अधिकार तथा शान्ति समाजका केन्द्रिय उपाध्यक्ष गोविन्द खनालले मतदाताहरुलाई भयरहित वातावरणमा मतदान गर्न पाउने अधिकारको सुनिश्चित गरिनुपर्ने बताए । उच्च अदालत  बारएशोसियसनका अध्यक्ष खडानन्द भण्डारीले निर्वाचनको निष्पक्ष पर्यवेक्षणका लागि सबैलाई आग्रह गरे ।

रीमा बि.सी.