समाचारहरू

निर्वाचन सामग्री लुटपाटमा संलग्न रहेको आरोपमा नेपाल कम्युनिष्ट पार्टीका कार्यकर्तालाई प्रहरीले असार ३ गते गिरफ्तार गरेको छ ।

प्रहरीले नेपाल कम्युनिष्ट पार्टी दाङका जिल्ला सदस्य ३० वर्षीय जनक बिकलाई लुटिएका निर्वाचन सामग्रीसहित शान्तिनगरबाट गिरफ्तार गरिएको जिल्ला प्रहरी कार्यालयका एसपी धिरजप्रताप सिंहले बताए ।

असार ३ गते शान्तिनगर गाउँपालिका-३ भलानेटीमा मतदाता शिक्षा दिइरहेका बेला मुख छोपेर आएका ५/६ जनाको समूहले मतदाता शिक्षा कार्यकर्ताहरू विमला खड्का र गीता भण्डारीबाट मतदाता नामावली, चेतनामूलक सामग्रीहरू, नमूना मतपत्र, स्वस्तिक छाप, निर्वाचन आचारसंहितासहितको एक झोला सामग्री लुटेर भागेका थिए ।

प्रहरीले लुटिएको झोलासहित बिकलाई गिरफ्तार गरी अनुसन्धान थालिएको जनायो । मतदाता शिक्षा कार्यक्रम सकिएपनि विकट क्षेत्र भएकाले स्वयंसेवकहरूले घरदैलो गरिरहेका थिए ।

जे.एन.सागर