निर्वाचन विरोधी गतिविधी गरेको आरोपमा राजपाका कार्यकर्ता गिरफ्तार

 

मतदातालाई मतदान नगर्न आग्रह गर्दै निर्वाचन विरोधी गतिविधिमा संलग्न रहेको आरोपमा प्रहरीले असार ८ गते रामग्राम नपा-१० बाट राष्ट्रिय जनता पार्टीका ६ जना कार्यकर्तालाई गिरफ्तार गरेको छ ।

गिरफ्तार हुनेहरूमा रामग्राम नपा-५ का राजपाका केन्द्रीय उपाध्यक्ष ५५ वर्षीय गोविन्द चौधरी, रामग्राम नपा-१ बस्ने राजपाका जिल्ला संयोजक पुरन चौधरी, रामग्राम नपा बस्ने राजपाका जिल्ला प्रवक्ता राधेरमण पाण्डे, रामग्राम नपा-१२ बस्ने राजपाका जिल्ला सदस्य ४३ वर्षीया चन्द्रिका चौधरी, सरावल नपा-१ का ४५ वर्षीय ओमप्रकाश चौधरी र रामग्राम नपा-२ का ५५ वर्षीय विजय अग्रहरी रहेका छन् ।

यसैगरी असार ८ गते नै अज्ञात समूहले सुनवल नपा-१२ मा पार्किङमा राखिएको एक पिकअप भ्यानमा आगजनी गरेको छ ।

सो वडामा माओवादी केन्द्रबाट वडा सदस्य पदका उम्मेदवार प्रेम थापाले निर्वाचन प्रचार- प्रसारमा प्रयोग गरेको लु १ ज १८१६ नम्बरको पिकअप भ्यानमा आगजनी भएको प्रहरीले जनाएको छ ।

आगजनीबाट भ्यानमा पूर्ण रूपमा क्षति पुगेको छ । घटनाको अनुसन्धान भइरहेको जिल्ला प्रहरी कार्यलय नवलपरासीले जनाएको छ ।


नारायण पराजुली