निर्वाचन आयोगद्वारा प्रदेश सभा र प्रतिनिधि सभा निर्वाचनका लागि कार्यतालिका सार्वजनिक

 

निर्वाचन आयोगले मङ्सिर १० र २१ गते हुने दुई चरणको प्रदेश र प्रतिनिधि सभा निर्वाचनको कार्यतालिका भदौ २६ गते सार्वजनिक गरेको छ ।

पहिलो चरणमा निर्वाचन हुने ३२ जिल्लामा कात्तिक ५ गते र दोस्रो चरणका ४५ जिल्लामा कात्तिक १६ गते उम्मेदवारको मनोनयन दर्ता गर्ने कार्यतालिका आएको छ । त्यस्तै समानुपातिक तर्फा उमेदवारको बन्दसूची भने असोज २९ गते नै पेश गर्नुपर्ने छ ।

भदौ २६ गते बसेको आयोगको बैठकले प्रदेश र प्रतिनिधि सभा निर्वाचनको कार्यतालिका स्वीकृत गरेको हो । राजनीतिक दलले बन्दसूची पेश गर्दा प्रतिनिधि सभा सदस्य निर्वाचनका लागि र प्रदेश सभा सदस्य निर्वाचनका लागि अलगअलग सूची पेश गर्नु पर्ने भएको हो । कार्यतालिका अनुसार समानुपातिक निर्वाचनका लागि आयोगले पहिले सूची पेश गर्ने समय तोकेको छ ।

भदौ २५ गते समानुपातिक सूचीका लागि दलहरूले निवेदन पेश गरिसकेका छन् । आयोगले दलहरूले पेश गरेको सूचीका आधारमा भदौ २८ गते नामावली प्रकाशित गर्ने छ । दलहरूले भदौ २९ गते नाम फिर्ता लिन सक्ने छन् भने अन्तिम नामावली प्रकाशन भदौ ३० गते हुने छ । राजनीतिक दलहरूले असोज २९ गते दलहरूको उमेदवारको बन्द सूची पेश गर्ने छन् । दलहरूले कात्तिक ६ गते बन्द सूची संशोधन गरी पेश गर्न सक्ने छन् ।

उम्मेदवारको बन्द सूचीमा सूचीकृत कुनै नाम उमेदवारले फिर्ता लिन चाहेमा कात्तिक १३ गते निवेदन दिन सक्ने छन् । कात्तिक १४ गते नाम फिर्ता लिएको जानकारी आयोगले सम्बन्धित दललाई दिने छ भने दलहरूले अर्को कुनै नाम राख्न चाहेमा निवेदन दिन सक्ने छन् ।

आयोगले कात्तिक १७ गते उम्मेदवारको बन्दसूचीमा रहेको नाम सार्वजनिक गर्ने छ । उमेदवारको योग्यतामा दावी विरोध भए कात्तिक १८ गते उजुरी दिन सकिने छ । कातिक २५ गते सो उपर आयोयले जाँच बुझ गर्ने छ  भने मङ्सिर २ गते बन्द सूचीबाट उम्मेदवारको नाम हटाउने छ । यस्तै मङ्सिर ३ गते उम्मेदवारको अन्तिम नाम प्रकाशित हुने छ भने मतदाताले मङ्सिर १० र २१ गते सम्बन्धित मतदान केन्द्रमा मतदान गर्ने छन् ।

राजनीतिक दलले उम्मेदवारको बन्दसूची निर्वाचन आयोगमा रहेको समानुपातिक निर्वाचन अधिकृतको कार्यालयमा पेश गर्न सक्ने आयोगले जनाएको छ । उम्मेदवारको बन्दसूची पेश गर्दा प्रतिनिधि सभा सदस्य निर्वाचनका लागि प्रतिनिधि सभा सदस्य निर्वाचन ऐन, २०७४ को दफा २८ बमोजिम र प्रदेश सभा सदस्य निर्वाचनका लागि प्रदेश सभा सदस्य निर्वाचन ऐन, २०७४ को दफा २८ बमोजिम पेश गर्नु पर्ने छ ।


सुभाष साह