निर्वाचन आचारसंहिता विपरीत गृहमन्त्रीद्वारा चुनावी सभामा सम्बोधन

 

सुरक्षा अनुगमनका लागि दाङ आएका गृहमन्त्री जनार्दन शर्माले असार ११ गते आचारसंहिता विपरीत नेकपा माओवादी केन्द्रद्वारा आयोजित चुनावी सभामा भाग लिएका छन् ।

उनले राप्ती गाउँपालिका-१ भालुवाङ, लमही नपा-२ सुनडवरी, गढवा गाउँपालिका-१ गढवा र घारोही उमनपा-१० नारायणपुरमा आयोजित माओवादी केन्द्रको चुनावी सभामा पुगेर माओवादी केन्द्रका उम्मेदवारलाई मतदान गर्न आग्रह गरे ।

त्यसैगरी घोराही उमनपा-२ को रामपुरमा नेपाली काङ्ग्रेस घोराही उमनपाका सहसंयोजक रेवती घिमिरेले २१ थान विद्युत पोल असार १० गते वितरण गरेको आरोप छ ।

विद्युत पोल बोकेर गएको गाडीले बालापुर भन्ने स्थानमा नौ ओटा विद्युत पोल खसालेको पाइएको छ भने सोही ठाउँ नजिकै थप १२ ओटा पोल खसाल्दै गर्दा एमालेका कार्यकर्ताहरूले समातेर प्रहरीलाई बुझाएको बताएका छन् ।

नेपाली काङ्ग्रेसका नेता घिमिरेको नाममा विल काटेर लगिएको पोल आचारसंहिता विपरीत मतदाताहरूलाई प्रलोभनमा पार्ने र झुक्याउने कार्य गरेको भन्दै रामपुर प्रहरीले ती पोल प्रहरी चौकीमा राखेको जिल्ला प्रहरी कार्यालयका एसपी धिरजप्रताप सिंहले बताए ।


जे.एन.सागर