समाचारहरू

निर्वाचन आचारसंहिता विपरीत चुनाव प्रचारप्रसार गरेको भन्दै प्रतिनिधि सभा सदस्य ५५ वर्षीया भगवती चौधरी, प्रदेश सभा सदस्य ६४ वर्षीय रामदेव यादवसहित पाँच जना जनप्रतिनिधिविरुद्ध मुख्य निर्वाचन अधिकृतको कार्यालयमा मङ्सिर ७ गते उजुरी परेको छ ।
नेकपा (एमाले)का उम्मेदवार सन्तु उराँवको पक्षमा मङ्सिर ६ गते राति मत मागेको भन्दै प्रतिनिधि सभा सदस्य चौधरी, प्रदेश सभा सदस्य यादव, गढी गाउँपालिका अध्यक्ष ५६ वर्षीय आशनारायण चौधरी, उपाध्यक्ष ३९ वर्षीया अनिताकुमारी साह, वडा नम्बर ६ का कार्यवाहक वडाध्यक्ष ४७ वर्षीय योगनारायण चौधरीविरुद्ध मुख्य निर्वाचन अधिकृतको कार्यालयमा उजुरी परेको हो ।
जनप्रतिनिधिहरुले राति प्रचारप्रसार गरेको भन्दै फोटो र भिडियोसहितको प्रमाण राखेर उजुरी दिएको नेकपा (माओवादी केन्द्र) गढी गाउँपालिकाका संयोजक राजाराम यादवले बताउनु भयो ।
मुख्य निर्वाचन अधिकृत मुकेश उपाध्यायले आफू गढी गाउँपालिका भन्दा बाहिर रहेकोले लिखित उजुरी हातमा नपरेको तर मौखिक जानकारी पाएको बताउनुभयो ।
उक्त आरोपमा कुनै सत्यता नभएको प्रतिक्रिया दिनुहुँदै प्रतिनिधि सभा सदस्य चौधरीले गढी गाउँपालिका–६ भवानीपुर हुँदै घर फर्किने क्रममा विनोद उराँवको घर अगाडि भेला भएका स्थानीयहरूले रोकेको बताउनु भयो ।
स्थानीय तह २०७९ को निर्वाचनमा नेकपा (एमाले) बाट निर्वाचित वडाध्यक्ष सदानन्द उराँव झागरको मृत्यु भएपछि मङ्सिर १६ गते हुन लागेको उपनिर्वाचनमा १२ जना उम्मेदवार प्रतिस्पर्धामा छन् ।

जयकृष्ण यादव