समाचारहरू

स्थानीय तह निर्वाचन ०७९ नजिकिदै जादा आचारसंहिता उल्लङघनका घटनाहरु बढदै गएको जिल्ला प्रतिनिधिहरुले जानकारी दिएका छन् ।

कास्की प्रतिनिधि सुशन घिमिरेका अनुसार निर्वाचन आचारसंहिता विपरित पोखरा महानगरपालिकका मेयर मानबहादुर जिसीले पोखरा वडा नम्बर ४ र ५ जोड्ने फिर्के पुलको उद्घघाटन गरेका छन् ।

निर्वाचन आचारसंहिता लागु भइसकेपछि कुनैपनि आयोजना शिलान्यास र उद्घघाटन गर्न नपाइने भनिएको छ ।

गोरखा प्रतिनिधि हरिराम उप्रेतीका अनुसार वैशाख ३० गते हुने स्थानीय तह निर्वाचनको मौन अवधि सुरु हुुन एक दिन बाँकी रहदा आचारसंहिता उल्लंघन बढेको छ । चर्को ध्वनि बजाएर प्रचार गर्दै उम्मेदवारहरु घरदैलोमा पुगेका छन् । निर्वाचन आचारसंहितामा चर्को ध्वनि प्रयोग गर्न नपाइने उल्लेख छ । त्यस्तै राजनीतिक दलहरुले शक्ति प्रदर्शनका लागि मोटरसाइकल र्‍याली गरी चर्को आवाजमा हर्न बजाउने गरेको पाइएको छ  । विशेष गरी सदरमुकाम क्षेत्रमा नेकपा एमाले, नेपाली कांग्रेस, नेकपा माओवादी केन्द्र, जनता समाजवादी पार्टी, तथा स्वतन्त्रबाट उम्मेदवार बनेकाहरु समेत मोटरसाइकल र्‍याली गर्दै आएका छन् । सार्वजनिक स्थलमा झण्डाको प्रयोग गर्न नपाइने भएपनि गोरखा बजार र ग्रामिण सडकका छेउछाउका पोलमा निर्वाचन चिन्ह अंकित झण्डा राखिएको छ ।

इन्सेक, गण्डकी प्रदेश कार्यालय