समाचारहरू

प्रधानमन्त्री पुष्पकमल दाहाल प्रचण्डले निर्वाचन आचार संहिताको उल्लङ्घन गरेको भन्दै राष्ट्रिय स्वतन्त्र पार्टीले वैशाख ७ गते मुख्य निर्वाचन अधिकृत कार्यालय, तनहुँमा उजुरी दर्ता गरेको छ ।

वैशाख ६ गते डुम्रेमा आयोजित चुनावी सभामा निर्वाचन आचार संहिता विपरीत नेपाली सेनाको हेलिकप्टर प्रयोग गरेको र गठबन्धनका उम्मेदवारको प्रचार प्रसारमा बहालवाला प्रधानमन्त्री संलग्न हुनु, उद्घाटन गर्ने बहानामा सेनाको हेलिकप्टर प्रयोग गरिनु र निर्वाचनको समयमा मतदाता प्रभावित बनाउने सार्वजनिक अभिव्यक्ति दिएको प्रति ध्यानाकर्षण भएको राष्ट्रिय स्वतन्त्र पार्टीले जनाएको छ ।

सत्ता गठबन्धनका उम्मेदवार भट्टराईको प्रचारमा बाहालवाला प्रधानमन्त्री दाहालसहित तीन जना पूर्व प्रधानमन्त्रीहरू शेरबहादुर देउवा, माधवकुमार नेपाल र बाबुराम भट्टराई नेपाली सेनाको हेलिकप्टरमा डुम्रे आउनु भएको थियो ।

राष्ट्रिय स्वतन्त्र पार्टीका जिल्ला उपसंयोजक सूर्यमणि पौडेलले मुख्य निर्वाचन अधिकृतको कार्यालयमा उजुरी दर्ता गरेको बताउनु भयो । प्रधानमन्त्री दाहालले  चुनावी सभामा गठबन्धनका उम्मेदवार भट्टराईलाई जिताएर पठाए मन्त्री बनाउने घोषणा गर्नु भएको थियो ।

प्रधानमन्त्री तथा मन्त्रीहरूले मतदातालाई कुनै प्रलोभन तथा आश्वासन दिनु पनि निर्वाचन आचार संहिता विपरीत हाे ।

निर्वाचन कसुर तथा सजाय ऐन, २०७३ तथा निर्वाचन कसुर तथा सजाय निर्देशिका २०७९ बमोजिम कारबाही माग गर्दै निवेदन दर्ता गरेको राष्ट्रिय स्वतन्त्र पार्टीका जिल्ला उपसंयोजक पौडेलले बताउनु भयो ।

तनहुँका मुख्य निर्वाचन अधिकृत कोमलनाथ आचार्यले उजुरी दर्ता गरी निर्वाचन आयोगलाई जानकारी गराइने बताउनु भयो ।

प्रकाशचन्द्र भट्टराई