निर्वाचनमा हुन सक्ने घटना रोक्न प्रशासनले बनायो सुरक्षा रणनीति

  ०७९ वैशाख २७ गते

जिल्ला प्रशासन कार्यालय सुर्खेतले वैशाख ३० गते हुने स्थानीय तहको निर्वाचनका लागि विशेष सुरक्षा रणनीति बनाएको छ । मतदान स्थलमा खटिने कर्मचारीको सुरक्षादेखि निर्वाचन अवधिमा मदिरा बिक्री वितरण र सेवनमा रोक लगाउने भएको हो ।

निर्वाचनको अवधिमा हुन सक्ने सम्भावित घटना रोक्न प्रशासनले मौन अवधि शुरु हुने वैशाख २७ गते राति १२ बजेदेखि मतदानको कार्य सम्पन्न नभएसम्मको लागि जिल्लाको कुनै पनि भागमा मादक पदार्थको बिक्री वितरण र सेवन कार्यलाई निषेध गरिएको प्रमुख जिल्ला अधिकारी खगेन्द्र प्रसाद रिजालले जानकारी दिनु भयो ।

त्यस्तै, मतदानस्थलमा खटिने कर्मचारीलाई हतोत्साहित गर्ने गतिविधि गरिए कारवाहीको दायरामा ल्याउने उहाँको भनाई छ । निर्वाचनलाई स्वच्छ, निष्पक्ष, पारदर्शी र भयमुक्त वातावरणमा सम्पन्न गर्न भन्दै प्रशासनले यस्तो सूचना समेत सार्वजनिक गरेको हो ।

जिल्लामा क्रियाशिल राजनीतिक दल, सार्वजनिक पदाधिकारीहरू, सरकारी कर्मचारी तथा सर्वसाधारण व्यक्तिले पालना गर्नुपर्ने निर्वाचन आयोगले जारी गरेको निर्वाचन आचारसंहिता पनि पालना गर्न प्रशासनको आग्रह छ ।

सूचना विपरित गतिविधि कोही कसैबाट भएको पाइएमा प्रचलित कानून बमोजिम कडा कारवाही गर्ने प्रशासनले चेतावनी समेत दिएको छ ।


पूर्णबहादुर खड्का