समाचारहरू

नेकपा माओवादी केन्द्र लालीगुराँस नगरपालिकाले चुनाव प्रचारप्रसारमा निर्वाचन आचारसंहिता तथा बाल अधिकार महासन्धिको उल्लङ्घन गर्दै विद्यार्थीहरू सहभागी गराएको छ ।

चुनाव प्रचारप्रसारमा विद्यालयका विद्यार्थीहरूलाई पार्टीको टिसर्ट र झण्डासहित सहभागी गराएको हो । बाल अधिकार महासन्धि अनुसार बालबालिका र विद्यार्थीहरू आफ्नै कार्यक्रम बाहेक कसैले पनि कार्यक्रममा सहभागी गराउन पाइँदैन ।

चुनाव प्रचारप्रसारमा विद्यार्थी प्रयोग भएको बारेमा विद्यालयका प्रधानध्यापक मानविकरण सुब्बाले विद्यालयमा समेत बालबालिका र विद्यार्थीलाई दलहरूले प्रयोग गरेको बारेमा उजुरी आएको बताए । उनले विद्यालयमा कक्षा ८ देखि १० सम्मका केही विद्यार्थीहरूको केही दिनदेखि हाजिरी नदेखिएको जानकारी दिए ।

बालबालिका प्रयोग गरेको भन्दै जिल्ला निर्वाचन कार्यालय तेह्रथुमले आफूहरूको ध्यानकर्षण भएको जनाएको छ । चुनाव प्रचारप्रसारको क्रममा विद्यार्थीहरूलाई प्रयोग गरेको भन्दै जिल्ला निर्वाचन कार्यालयले विद्यालय र माओवादी पार्टी केन्द्रलाई पत्राचारसमेत गरिएको जिल्ला निर्वाचन कार्यालयका प्रमुख निर्मलकुमार राईले जानकारी दिए ।

निर्वाचन प्रचारप्रसारमा निर्वाचन आचारसंहिता तथा बाल अधिकार महासन्धिको उल्लङ्घन गर्दै बालबालिकाहरू सहभागी गराएको भन्दै अधिकारकर्मीहरूले यसको नियन्त्रण गर्नका लागि सम्बन्धित संस्थाले चासो दिनु पर्ने माग गरेका छन् ।

भगिश्वर लिम्बू