निर्वाचनमा बालबालिकाको प्रयोग नगर्ने विषयमा दलहरू प्रतिबद्ध

  ०७४ वैशाख १० गते

डडेल्धुरामा क्रियाशील राजनीतिक दलहरूले स्थानीय तहको निर्वाचनमा बालबालिकाको प्रयोग नगर्ने तथा प्रयोग हुन नदिने प्रतिबद्धता जनाएका छन् । जिल्ला बाल कल्याण समितिको पहलमा वैशाख १० गते राजनीतिक दलका नेताहरूले यस्तो प्रतिबद्धता जनाएका हुन् ।

स्थानीय तहको निर्वाचनमा बालबालिकाहरू प्रयोग नगर्न राजनितिक दलहरूलाई आग्रह गरिएपछि दलहरूका तर्फबाट बालबालिकाको प्रयोग नगर्ने प्रतिबद्धता आएको हो । सो अवसरमा जिल्ला बालकल्याण समिति तथा बालबालिकाका पक्षमा सक्रिय विभिन्न सामाजिक सङ्घसंस्थाका प्रतिनिधिहरूले स्थानीय तहको निर्वाचनमा बालबालिकालाई कुनै पनि काममा प्रयोग नगर्न सम्बन्धित सबैसँग आग्रह गरेका छन् ।

प्रमुख राजनीतिक दलले बालबालिका र विद्यालयलाई शान्ति क्षेत्रका रूपमा स्वीकार गर्दै कुनैपनि राजनीतिक गतिविधिमा बालबालिकालाई संलग्न नगराउने र विद्यालयलाई राजनीतिक थलोका रूपमा प्रयोग नगर्ने लिखित प्रतिबद्धता व्यक्त गरेको सहायक प्रमुख जिल्ला अधिकारी करूणाकर अवस्थीले जानकारी दिए ।

निर्वाचन प्रचार-प्रसार, आमसभा तथा जुलुसमा बालबालिका प्रयोग गर्न नहुने विषयमा निर्वाचन आचारसंहिता २०७२ (दोस्रो संशोधन, २०७३) ले प्रतिबन्ध लगाएको छ ।


भुपेन्द्र बिष्ट