समाचारहरू

यही वैशाख ३० गते हुन लागेको स्थानीय तहको निर्वाचनको तयारी सप्तरीमा अन्तिम चरणमा पुगेको मुख्य निर्वाचन अधिकृत चन्द्रमणि ज्ञवालीले जानकारी दिनु भएको छ । “कर्मचारीलाई नियुक्ति पत्र, मतपत्र, मतपेटिका लगायत निर्वाचन सामग्रीसहित मतदान केन्द्रमा पठाउन सुरु गरेका छौँ,”–उहाँले भन्नु भयो, –“मतदान केन्द्र (बुथ) निर्माणको कामसमेत सुरु गरिएको छ ।”

सप्तरीका सबै १८ पालिकाका २ सय ९७ मतदान स्थलमा व्यवस्था गरिएको ५ सय ३६ मतदान केन्द्रका लागि ५ सय ३६ मतदान अधिकृत र त्यतिकै सङ्ख्यामा सहायक मतदान अधिकृत खटाइएको छ । आसन्न स्थानीय तहको निर्वाचनका लागि जिल्लामा २ सय ९७ मतदानस्थल निर्धारण गरिएकोमा २ सय ८ वटा अति संवेदनशील, ८५ संवेदनशील र चार वटा मतदान स्थल सामान्यमा राखिएको छ ।

निर्वाचन सुरक्षित र मर्यादित बनाउन प्रत्येक मतदानस्थललाई केन्द्रित गर्दै १ हजार ५ सय ९४ नेपाल प्रहरी, २ हजार ९ सय ४८ म्यादी प्रहरी, ७ सय नेपाली सेना तथा ६ सय सशस्त्र प्रहरी परिचालन गरी सुरक्षा व्यवस्था मिलाइएको जिल्ला सुरक्षा समितिका संयोजक एवं प्रमुख जिल्ला अधिकारी जनार्दन गौतमले जानकारी दिनु भयो । उहाँका अनुसार आसन्न स्थानीय तहको निर्वाचनलाई धाँधलीरहित तथा मर्यादित बनाउन निर्वाचनमा भाग लिएका जिल्लास्थित सबै राजनीतिक दलले प्रतिबद्धतासमेत जनाएका छन् ।

मतदान अधिकृत र सहायक मतदान अधिकृतलाई निर्वाचनसम्बन्धी तालिम दिएर आवश्यक निर्वाचन सामग्रीसहित तोकिएको कार्यक्षेत्रमा पठाइएको जिल्ला निर्वाचन कार्यालयका अधिकारी रमेश जोशीले जानकारी दिनु भयो । उहाँले भन्नु भयो,–“वैशाख ३० गते हुने निर्वाचन सौहार्दपूर्ण वातावरणमा सम्पन्न हुने अपेक्षा गरेका छौँ ।”

वैशाख ३० गते सम्पन्न हुने स्थानीय तहको निर्वाचनमा जिल्लाका १८ स्थानीय तहमा ४ लाख १२ हजार ४ सय ४५ ले मतदान गर्न पाउने भएका छन् । महिला १ लाख ९८ हजार ५ सय ३२, पुरुष २ लाख १३ हजार ८ सय ९२ जना र २१ अन्य मतदाताले वैशाख ३० गते हुने स्थानीय तहको निर्वाचनमा मतदान गर्न पाउने जिल्ला निर्वाचन कार्यालय सप्तरीका निर्वाचन अधिकारी जोशीले बताउनु भयो ।

मनोहरकुमार पोखरेल