निगरानी समूहको ध्यानाकर्षणपछि स्थानीय सरकार बोटे कुमाल बस्तीमा पुग्यो

मानवअधिकार निगरानी समूहको ध्यानाकर्षणपछि बगनासकाली गाउँपालिका र गाउँपालिकामा रहेको कृषि शाखाले जिल्लाका बोटे कुमाल तथा अन्य विपन्न समुदायलाई कृषि र पशुपालनमा संलग्न गराउन स्थलगत कार्य थालनी गरेको छ ।

इन्सेकको पहलमा गठन भएको जिल्ला स्तरीय मानव अधिकार निगरानी समूहले माघ १९ गते बगनासकाली गाउँपालिकालाई बोटे तथा कुमाल र अन्य विपन्न समुदायको आर्थिक सामाजिक विकासका लागि उनीहरूलाई कृषि तथा पशुपालनमा ल्याउन विशेष कार्यक्रम बनाउन अनुरोधसहित ध्यानाकर्षणपत्र बुझाएको थियो ।

photo20180210palpa

निगरानी समूहको ध्यानाकर्षण पछि बगनासकाली गाउँपालिका-७ खानीगाउँ दैलातुङ्ग, वडा नं. ६ यम्घाको दर्पुकमा रहेका बोटे समुदायलाई सङ्गठित गरी उनीहरूलाई कृषि कार्यमा प्रेरित गरिएको कृषि शाखा प्रमुख सन्तोष जिसीले बताए ।

उनीहरूलाई पहिलो चरणमा तरकारी किट वितरण गरिएको छ । त्यस्तै बगनासकाली गाउँपालिका-१ चिर्तुङधारा र पोखराथोकका ६० घर कुमाल समुदायलाई सङ्गठित गरी उनीहरूलाई उन्नत जातको तरकारी किट समेत वितरण गरिएको जिसीले बताए ।

उनीहरूलाई सङ्गठित गरिएको र समूहगत तालिम समेत प्रदान गरी कृषि तथा पशुपालनलगायतमा लगाएर उनीहरूको आर्थिक सामाजिक सवलीकरण गरिने गाउँपालिका अध्यक्ष कृष्णप्रसाद बस्यालले बताए ।


यज्ञमूर्ति तिमिल्सिना