समाचारहरू

पाल्पा कारागारका पुरुष बन्दीहरूले कारागार भित्रै नाम्लो र दाम्लो बाटेर राम्रो आम्दानी लिँदै आएका छन् ।

कारागारमा रहेका पुरुष बन्दीहरूले बुनेका नाम्लो तथा दाम्लोहरू तानसेन बजारका साथै बुटवल, चितवन र काठमाडौँका साथै विभिन्न मेला महोत्सवहरूमा विक्री हुने गरेको बन्दी चौकीदार विष्णुप्रसाद श्रेष्ठले बताए ।

कारागारमा १ सय भन्दा बढी बन्दीहरूले बिहानदेखि साँझसम्म दाम्लो र नाम्लो बाट्ने गरेको श्रेष्ठले बताए । उनले भने-"बन्दीहरूलाई आवश्यक पर्ने कच्चा पदार्थ मैले नै उपलब्ध गराउने गरेको छु र उनीहरूका उत्पादन पनि उनीहरूलाई फाइदा दिएर मैले नै बजारमा पठाउने गर्छु" यसरी आयआर्जनका काममा लागेका बन्दीहरू खुशी रहेकोसमेत उनले सुनाए ।

यसरी काम गरेर बन्दीहरूले मासिक रूपमा १० हजार रुपियाँसम्म फाइदा लिने गरेको अर्का बन्दी खगु बस्यालले बताए । कारागार भित्र रहेको पुस्तकालयको समेत व्यवस्थापकको काम गर्दै आएका बस्यालले यसरी काम गर्दा बन्दीहरू ब्यस्त हुने बताए । "आयआर्जनको काम गर्नेहरू काममै ब्यस्त हुन्छन् काम नगर्नेहरूले पनि पुस्तकालयमा रहेका पुस्तक तथा पत्रपत्रिकाहरू अध्ययन गर्छन् ।"-बस्यालले भने ।

कारागारकी जेलर सुजाता कार्कीले पुरूष बन्दीहरूतर्फ आयआर्जनका लागि काम भएको तर महिला तर्फत्यस्तो हुन नसकेको बताइन् । बन्दीहरू त्यसै गफ गरेर बस्नुभन्दा आयआर्जनका काममा लाग्दा राम्रो भएको उनको अनुभव छ । हाल यो कारागारमा २ सय ८ पुरूष बन्दी र ५३ महिला बन्दी रहेका छन् ।

यज्ञमूर्ति तिमिल्सिना