समाचारहरू

नाम्खा गाउँपालिका-१ देखि ६ वडाका स्थानीयबासीले ०७३ सालदेखि नै खाद्यान्न नपाएको गुनासो गरेका छन् । सरकारद्वारा ढुवानी अनुदानको खाद्यान्नमा समस्या भएपछि नाम्खा गाउँपालिकाका सबै वडामा खाद्यान्नको समस्या भएको स्थानीयबासी साङ्गे लामाले गुनासो गरेका छन् । उनले भने-'हुम्लामा खाद्यान्न नपाइएपछि चाइनाबाट ल्याइएको पिठो खाने गरेका छौँ ।'

नेपाल सरकारको लापरवाहीले हुम्ली जनता खान पाउने अधिकारबाट वञ्चित हुनुपरेको स्थानीयबासी नागमेल लामाले बताए । उनले भने-'नाम्खाका हजारौँ स्थानीयलाई दुई वर्षबितिसक्दासम्म पनि खाद्यान्न नपाउनुको कारण के हो ? राज्यले पनि सौतेनी व्यवहार गर्न त नमिल्ला नि !'

'खाद्यान्नको लागि सदरमुकाम सिमकोटमा जाउँ भने पनि हप्ता दिन लाग्छ, बाटोमा खर्च गर्ने रुपियाँ समेत हुँदैन हामी दुरदराजका गाउँमा रहेका स्थानीयलाई सरकारी सेवा सुविधाबाट पनि वञ्चित गराएको छ ।'-स्थानीयको गुनासो छ ।

समयमा जानकारी नहुँदा विभिन्न सामाजिक सुरक्षा भत्ता समेत बेलैमा पाउन नसकेको उनीहरूको गुनासो छ ।

खाद्य संस्थानको पैदल मार्गको खाद्यान्न चिनको केरुङ नाकाबाट लासा हुँदै हिल्सा पुग्नु पर्ने भएता पनि हालसम्म खाद्यान्न नपुग्दा समस्या भएको स्थानीयको आरोप छ ।

जिल्ला खाद्य व्यवस्थापन समितिको निर्णय अनुसार नाम्खा गाउँपालिकामा खाद्यान्न वितरणका लागि हिल्सामा खाद्य गोदाम राखेको छ । एक वर्षमा कम्तीमा पनि सो केन्द्रमा ४ हजार क्वीन्टल चामल पुग्नु पर्ने हो, तर १ हजार २ सय क्वीन्टल खाद्यान्न पनि बिच बाटोमै रोकिएको नेपाल खाद्य संस्थान शाखा कार्यालय सिमकोटले जनाएको छ ।

हिल्सामा पर्याप्त मात्रामा खाद्यान्न नभएपछि वडा नं. ४, ५ र ६ का ५ सय ४० घरधुरी प्रत्यक्ष मर्कामा परेको स्थानीयबासी कर्मा लामाले बताए ।

नागरिकता र सिमा पास बाहेक राज्यबाट उपलब्ध हुने अन्य सेवा र सुबिधाबाट पनि वञ्चित भएको लामाले गुनासो गरे ।

त्यस्तै नाम्खामा कार्यरत सम्पूर्ण कर्मचारी, जनप्रतिनिधि, विद्यार्थीलगायतका व्यक्तिले पनि खाद्यान्न नपाएको गुनासो गरेका छन् ।

यस विषयमा खाद्य संस्थान शाखा कार्यालय सिमकोटलाई बुझ्दा कार्यालय प्रमुख रामबहादुर विष्टले भने गोर्खा जिल्लाबाट सरुवा भई आएको एक हप्तामात्र भएकाले सबै समस्या बुझन बाँकी नै रहेको बताए ।

नन्द सिंह