समाचारहरू

पिपरिया–३ की ३० वर्षीया गुन्द्रदेवी पण्डितले गरिबीका कारण १० वर्षीया छोरी चन्दाकुमारी पण्डितको हत्या गरी आत्महत्या गरेको जिल्ला प्रहरी कार्यालय सर्लाहीले जनाएको छ ।

पुस १८ गते घरको ढोका बन्द गरी गुन्द्रदेवीले १३ वर्षीया छोरी पुजाकुमारी, चन्दा कुमारी, तीन वर्षीया राधा कुमारीलाई विष खुवाएर आफू पनि विष सेवन गरी आत्म हत्या गरेको इलाका प्रहरी कार्यालय हरिपुरका इन्स्पेक्टर चरित्रविक्रम कार्कीले बताए ।

छोरालाई भैँसी चराउन पठाएर छोरीहरूलाई विष खुवाएर आफूले पनि विष सेवन गरेको इन्स्पेक्टर कार्कीले बताए । ‘छिमेकमा झै–झगडा भएको छैन । पति काम गर्न बाहिर गएका थिए ।’–इन्स्पेक्टर कार्कीले भने–‘आर्थिक अवस्था कमजोर देखिएको छ । छोरी पाँच जना छन् । छोरीलाई तीलक (दाइजो) दिनसक्ने क्षमता देखिँदैन । छोरीहरूको विवाह गर्न समस्या होला भनेर घरको ढोका भित्रैबाट चुकुल लगाएर एकै ठाउँमा छोरीहरूलाई बसाएर विष सेवन गरेको घटना स्थलको प्रकृति देखिन्छ ।’

विष सेवनबाट अशक्त भएका उनीहरूलाई उपचारका लागि सर्लाही जिल्ला अस्पताल मलङ्गवा ल्याउँदै गर्दा दुवै जनाको मृत्यु भएको प्रहरीले जनाएको छ । विष सेवनबाट असक्त भएकी पुजाकुमारी र राधाकुमारीको उपचार मलङ्गवामा सम्भव नभएपछि थप उपचारका लागि वीरगञ्जस्थित नेशनल मेडिकल अस्पतालमा पठाइएको प्रहरीले जनाएको छ । उनीहरू दुवै जनाको स्वास्थ्यमा सुधार भएको प्रहरीले जनाएको छ ।

मृतक आमा छोरीको शव पोष्टमार्टमका लागि सर्लाही जिल्ला अस्पतालमा राखिएको प्रहरीले जनाएको छ ।

प्ररम्भिक अनुसन्धानको क्रममा मृत्युको कारण गरिबी भएको घटना स्थाल पुगेका डिएसपी सिताराम रिजालले बताए । घरमा एक बोरा धान र एउटा भैँसी मात्र सम्पत्ति भएकी गुन्द्रादेवीले पाँच छोरी र एक छोराको पालनपोषन तथा छोरीको विवाह सम्भव नदेखेरै आत्महत्याको बाटो रोज्न बाध्य भएको प्रारम्भिक अनुसन्धानमा देखिएको रिजालको भनाइ छ ।

सन्तोषकुमार सिंह