समाचारहरू

तीन वर्षीया नाबालक छोरीलाई बिष खुवाई हत्या गरेको कसूरमा दैलेख जिल्ला अदालतले माघ २४ गते आमालाई जन्मकैद फैसला गरेको छ । दाङ्ग जिल्लाको घोराही उपमहानगरपालिका–१२ रतनपुर विवाह भएकी २२ वर्षीया हरिमाया रावलले एक वर्ष अघि माइतीघर दैलेखको गुराँस गाउँपालिका–२ लम्चुरीमा हत्या गरेको भन्दै उक्त फैसला अदालतले गरेको छ  ।

तीन वर्षीया छोरी मुना सार्कीलाई बिष खुवाई हत्या गरेको पुष्टि भएको भन्दै जिल्ला न्यायाधीश बलराम लम्सालको इजलासबाट हरिमायालाई मुलुकी अपराध सहिंताको दफा १३७ बमोजिम जन्मकैद (२५ वर्ष) जेल सजाय भएको अदालतका श्रेस्तेदार उपसचिव इन्द्रबहादुर कार्कीले जानकारी दिनु भएको छ ।

घरपरिवारसँग असमझदारी भएपछि माइतीघरमा बस्दै आएकी हरिमायाले भाउजुसँगको विवादमा पीडा बोध गरी आफू र छोरी समेतसँगै मर्ने उद्देश्यले ०७८ माघ २७ गते तरकारीका लागि घरमा राखिएको ‘मेटासिट’ नामको बिषादी खाएकोमा उपचार चल्दै गर्दा ०७८ फागुन ४ गते छोरीको मृत्यू भएको थियो ।

माइतीमा बसेको बेला अरु कुनै बाहनामा नाबालिकालाई बिष खुवाई हत्या गरिएको घटना क्षमा योग्य नहुने भन्दै हरिमायाकी सासु डिलसरा सार्कीले जिल्ला प्रहरी कार्यालय, दैलेखमा ०७८ फागुन ४ गते उजुरी दिएपछि उसै दिन हरिमायालाई प्रहरीले गिरफ्तार गरेको थियो ।

मृतक बालिकाको शव परीक्षण कर्णाली प्रदेश अस्पताल, सुर्खेतमा फागुन ४ गते भएको थियो । प्रहरीले गरेको अनुन्धानको आधारमा जिल्ला सरकारी वकील कार्यालयले दैलेख जिल्ला अदालतमा फागुन २७ गते कर्तव्य ज्यान सम्वन्धी अभियोग दर्ता गराएको थियो ।

६ वर्ष अघि दाङ्ग जिल्लाको घोराही उपमहानगरपालिका–१२ रतनपुरका उतिबेला १९ वर्षीय प्रबीण सार्कीसँग दैलेखको गुराँस गाउँपालिका–२ लम्चुरीकी हरिकला रावलले त्यसबेला आफू १६ वर्षीया छँदा विवाह भएको थियो ।

अमर सुनार