समाचारहरू

नागरिक समाज र स्थानीय सरकारबीच सहकार्य भएमात्र सरकारले परिकल्पना गरेको 'सुखी नेपाल र समृद्ध नेपाल' को अभियानले सफलता हासिल गर्ने सरोकारवालाहरूले बताएका छन् ।

इन्सेकको आयोजनामा मङ्सिर ९ गते विदुरमा भएको 'नागरिक समाज तथा स्थानीय सरकारबीचको सहकार्यका अवसर र चुनौती' विषयक कार्यक्रमका सहभागीहरूले नागरिक समाज र स्थानीय सरकारबीचको सहकार्यबाट नै नागरिकले पाउने सेवा प्रभावकारी हुने बताएका हुन् ।

कार्यक्रममा प्रतिनिधिसभा सदस्य नारायणप्रसाद खतिवडाले नागरिक समाज र स्थानीय सरकारबीच सहकार्य भएमात्र स्थानीय आवश्यकताको सरकारले सहज रूपमा परिपूर्ति गर्न सक्ने बताए ।

उनले नागरिक सङ्घसंस्थाहरूले पनि स्थानीय सरकारको आवश्यकतालाई ध्यान दिएर सामाजिक कामहरू गरेर सकारात्मक नतिजा आउने बताए । सांसद खतिवडाले भने-'नागरिक समाज भन्दैमा स्थानीयको हितविपरीत काम गर्नेसँग सहकार्य गर्नुपर्छ भन्ने छैन । तर, समग्र नागरिकको हितका काम गर्न चाहने, यस्ता योजनाहरू बनाउनेलाई स्थान दिनुपर्छ ।'

कार्यक्रममा विदुर नगरपालिकाको प्रतिनिधित्व गरी सहभागी भएका वडा-४ का अध्यक्ष टलकमान श्रेष्ठले नागरिकले आफ्नो आवश्यकता सहज ढङ्गले पुरा गराउने पहिलो सरकार स्थानीय सरकार नै भएकाले  स्थानीय सरकार र नागरिक समाजको सहकार्य भएमा जस्तोसुकै चुनौतीलाई पनि अवसरका रूपमा परिवर्तन गराउन सकिने बताए ।

किस्पाङ गाउँपालिका-१ का वडाअध्यक्ष आइत घलेले कार्यक्रममा नागरिक समाजको अगुवाइको कारण स्थानीय सरकारले पारदर्शी भएर काम गर्न सक्ने भएकाले सहकार्य आवश्यक रहेको बताए । उनले हरेक चुनौतीहरूलाई अवसरको रूपमा रूपान्तरण गर्न सहकार्यको विकल्प नभएको बताए ।

त्यस्तै कार्यक्रममा नेपाल नागरिक समाजका जिल्ला अध्यक्ष बाबुराम लामिछानेले स्थानीय सरकार नागरिकको दैलोमा, आँगनमा भेटिने अवस्था आएकोले नागरिक समाजसँगको सहकार्यले धेरै अवसरहरू सिर्जना गर्ने बताए ।

कार्यक्रममा गैससकर्मी लक्ष्मी फुयाँलले नागरिक समाज र स्थानीय सरकारले एकअर्कालाई परिपुरकको रूपमा लिएमा सरकारले समृद्धिको योजनाहरू कार्यन्वयन गराउन सहज हुने बताइन् ।

कार्यक्रममा सहभागीहरूले स्थानीय तहहरूलाई नागरिक समाजसँग सहकार्य गरी आफ्ना गतिविधिहरू जनतासमक्ष लैजान आग्रह गरेका थिए ।

नवदीप श्रेष्ठ