समाचारहरू

तीन दिनकी नवजात शिशु (छोरी) फालेको आरोपमा प्रहरीले दुहबी नगरपालिका–१० का ३३ वर्षीय बाबु अमितलाल चौधरीलाई माघ ७ गते गिरफ्तार गरेको छ ।

३० वर्षीया पत्नी विन्दा चौधरीले माघ ४ गते वीपी कोइराला स्वास्थ्य विज्ञान प्रतिष्ठान धरान घोपामा जन्म दिएकी शिशुलाई बाबुले फालेको प्रहरीको भनाइ छ ।

नवजात शिशुलाई माघ ६ गते अमितलालले बराहक्षेत्र नगरपालिका–२ को चारकोसे झाडीमा फालेको प्रारम्भिक अनुसन्धानका क्रममा खुलेको इलाका प्रहरी कार्यालय धरानका डिएसपी वुद्ध श्रेष्ठले बताउनु भयो ।

नवजात शिशु जङ्गलमा फालिएको अवस्थामा देखेपछि वस्तु चराउन गएका स्थानीयले इलाका प्रहरी कार्यालय महेन्द्रनगरलाई खबर गरेका थिए ।

प्रहरी र जनप्रतिनिधिको टोलीले शिशुको उद्दार गरी शिशुलाई आमाको जिम्मा लगाइएको इलाका प्रहरी कार्यालय धरानका डीएसपी वुद्ध श्रेष्ठले बताउनु भयो ।

माघ ६ गते पतिसँगै पत्नीलाई गिरफ्तार गरेको भएपनि अनुसन्धानका क्रममा पतिको दबावले आफूले छोरी फाल्न दिएको बताएपछि शिशु जिम्मा लगाएर आमालाई छोडिएको डिएसपी श्रेष्ठले बताउनु भयो ।

आरोपितविरूद्ध प्रहरीले जिल्ला अदालत माघ ९ गते कर्तव्य ज्यान शीर्षकमा मुद्दा दर्ता गरी कारबाही अघि बढाएको छ ।

जयकृष्ण यादव