समाचारहरू

हेलम्बु गाउँपालिका-५ महांकालकी २२ वर्षीया रबिना तामाङलाई आफैले जन्माएको नवजात शिशुलाई खाल्डोमा पुरेर हत्या गरेको आरोपमा प्रहरीले ०७९ मङ्सिर १ गते गिरफ्तार गरेको छ ।

आरोपितले नवजात शिशुको ०७९ कात्तिक २९ गते राती जन्म हुने बित्तिकै घरभन्दा ५० मिटर पर बारीमा खाल्डो खनेर जिउँदै गाडेको आरोप छ ।

स्थानीयको सूचनाको आधारमा आरोपित रबिनालाई घरबाट गिरफ्तार गरेको जिल्ला प्रहरी कार्यालयका डिएसपी शिव बुढाथोकीले बताउनु भयो ।

घटना स्थल आसपासका स्थानीय बासिन्दाहरूको सूचनाका आधारमा प्रहरी घटनास्थलमा पुगि पुरिएको अवस्थामा शव बरामत गरेको थियो । प्रहरीले मङ्सिर १ गते प्रहरी प्रतिबेदनका आधारमा जाहेरी दर्ता गरेको छ ।

शवको पोष्टमार्टम मङ्सिर १ गते प्राथमिक स्वास्थ्य केन्द्र मेलम्चीमा भएको हेलम्बु गाउँपालिका ५ का वडा अध्यक्ष दीपककुमार लामाले बताउनु भयो ।

घटनाको अनुसन्धान जिल्ला प्रहरी कार्यालयले गरिरहेको जिल्ला प्रहरी कार्यालय मुद्दा शाखा प्रमुख हरिबोल के.सी.ले बताउनुभयो ।

आरोपित तामाङको पति तीन वर्ष अघिदेखि मज्दुरीका लागि विदेश रहेका छन् । पति घरमा नभएको अवस्थामा अवैध गर्भबाट शिशुको जन्मभएकोले शिशुको हत्या गरेको आशंका प्रहरीले गरेको छ ।

नातिबावु धिताल