समाचारहरू

राप्ती गाउँपालिका-१ भालुवाङ निवासी नयाँ शक्ति पार्टी नेपालका कार्यकर्ता ३२ वर्षीय जीवलाल न्यौपानेलाई वाइसिएलका राप्ती गाउँपालिका इञ्चार्ज दीपक पुनले जेठ २३ गते कुटपिट गरेको पीडित पक्षको आरोप छ ।

भालुवाङ राप्ती पुल नजिकै हिँडिरहेका बेला आरोपित पुनले एकाएक कुटपिट गर्दा पीडित न्यौपानेको मुखमा गम्भीर चोट लागेको छ । घाइते न्यौपानेको स्थानीय मेडिकलमा प्राथमिक उपचारपछि भैरहवाको युनिभर्सल मेडिकल कलेजमा लगिएको छ ।

पीडित परिवारले छुरा प्रहार गरेको बताएपनि प्रहरीले मुक्का हानेको र हतियारको प्रयोग नभएको पाइएको जनाएको छ । न्यौपानेको माथिल्लो ओठ र नाकसम्म काटिएर गम्भीर चोट लागेको छ ।

न्यौपानेले राप्ती पुलमा टाँगिएको माओवादी केन्द्रको चुनावी झण्डा फालिदिएको वाइसिएल इञ्चार्ज दीपक पुनले आरोप लगाएका छन् भने न्यौपानेले आफूलाई झण्डाको विषयमा कुनै जानकारी समेत नभएको र पार्टीले थालेको चुनावी गतिविधिलाई निस्तेज गर्न आफूमाथि आक्रमण गरिएको बताएका छन् ।

यसअघि जेठ २२ गते मात्रै पीडित न्यौपानेका दाजु तथा नयाँ शक्ति पार्टी राप्ती गाउँपालिका संयोजक होमप्रसाद न्यौपाने र नयाँ शक्तिका राप्ती गाउँपालिकाका अध्यक्षका उम्मेदवार नन्दकुमार चौधरीलाई पैसा बाँडेको भन्दै तीनै दीपक पुनलगायतको समूहले कुटपिट गरेको थियो ।

उम्मेदवार चौधरी र पार्टीका संयोजक तथा दाजु होमलाल न्यौपानेलाई कुटपिट गरेको २४ घण्टा नबित्दै जीवलाल न्यौपानेलाई आक्रमण गरेको प्रहरीले जनाएको छ ।

आफ्ना उम्मेदवार, नेता तथा कार्यकर्तामाथि कुटपिट गर्दा पनि मुकदर्शक भएको भन्दै नयाँशक्ति पार्टीका कार्यकर्ता तथा स्थानीय एवम् पीडितका आफन्तहरूले इलाका प्रहरी कार्यालय भालुवाङमा जेठ २३ गते राति ८ बजेदेखि ३ बजेसम्म नारावाजी गरेपछि कुटपिट गरी भागेका वाइसिएल इञ्चार्ज पुनलाई गिरफ्तार गरी थुनामा राखेको जिल्ला प्रहरी कार्यालयका एसपी धिरजप्रताप सिंहले बताए । उनले घटनाको अनुसन्धान भइरहेको बताएका छन । पीडित परिवार तथा पार्टीका नेता, कार्यकर्ताहरूले कारबाहीको माग गर्दै जिल्ला प्रशासन कार्यालय र जिल्ला प्रहरी कार्यालयमा जेठ २४ गते ध्यानाकर्षण पत्र बुझाएका छन् ।

जे.एन.सागर