समाचारहरू

छोराका हत्याराहरूमाथि कानुनी कारबाहीको माग गर्दै आएका गोरखा फुजेलका नन्दप्रसाद अधिकारीको मृत्यु भएको पाँच वर्ष पुगेको छ ।

१७ वर्षीय छोरा कृष्णप्रसाद अधिकारीको हत्याका आरोपितहरूलाई कानुनी कारबाहीको माग गर्दै अनसन बसेका नन्दप्रसादको ३ सय ३४ दिनको दिन ०७१ असोज ६ गते मृत्यु भएको थियो ।

उनको मृत्युको पाँच वर्षपुगेको दिनको अवसर पारेर विभिन्न अधिकारकर्मीहरूले असोज ६ गते वीर अस्पतालमा श्रद्धाञ्जली कार्यक्रमको आयोजना गरेको बताए ।

कार्यक्रममा नन्दप्रसादकी पत्नी गङ्गामाया अधिकारीले आफ्नो पतिको मृत्यु भएको यतिका वर्षसम्म पनि आफ्ना मागहरूको सुनुवाइ सरकारले नगरेको र अबका दिनमा आफू पनि अनसन नै बसेर मृत्युलाई स्वीकार गर्ने बताएकी छन् ।

पाचौँ स्मृति दिवसका अवसरमा राष्ट्रिय मानव अधिकार सङ्गठनका अध्यक्ष इन्द्रप्रसाद अर्यालले नन्दप्रसादको शवलाई समेत न्याय दिन नसकेको आरोप लगाए ।

अधिकारकर्मी चरण प्रसाईले गङ्गामायालाई नेपाल सरकारले नै न्याय दिनु पर्ने बताउँदै भने-'यदि सरकारले न्याय नदिने हो भने अन्तर्राष्ट्रिय ढोका ढ्कढक्याउन जान आफूहरूलाई बाध्य नबनाउन आग्रह गरे ।

गङ्गामायाका छोरा कृष्णप्रसाद अधिकारीको ०६१ जेठ २४ गते चितवनमा तत्कालीन माओवादीका कार्यकर्ताले निर्ममतापूर्वक हत्या गरेको भन्दै आरोपितलाई पहिचान गरी कारबाहीको मागसहित उनी लामो समयदेखि सङ्घर्षरत छिन् । नन्दप्रसाद अधिकारीको शव टिचिङ्ग अस्पतालमा रहेको छ ।

विमला पौडेल