समाचारहरू

मधुवन नपा-६ स्थित मधुवन नगरपालिकाको कार्यालय रहेको भवनमा फागुन १३ गते साँझ पौने ६ बजे अज्ञात समूहले बम विस्फोट गराएको छ ।

बम विष्फोटबाट नगरपालिका भवनको झ्यालका सिसाहरू फुटेका छन् । 'अनटेष्ट' मोटरसाइकलमा दुई जनाको सङ्ख्यामा आएका व्यक्तिले नगरपालिकाको कार्यालयमा झोला राखेको स्थानीयवासीले बताए । प्रत्यक्षदर्शीका अनुसार झोला राखेर मोटरसाइकल चढे लगत्तै बम विष्फोट भएको थियो ।

उक्त विष्फोटक पदार्थ 'टाइम बम' हुनसक्ने प्रहरीले अनुमान गरेको छ । विष्फोटबाट सो भवनका झ्याल तथा नजिकै बन्दै गरेको पार्टी प्यालेस भवनको सिसा फुटेका छन् ।

इलाका प्रहरी कार्यालय सानोश्रीका सई हरिबहादुर खड्काका अनुसार साँझको समयमा बम विष्फोट भएको थियो । विष्फोटपछि मधुवन नगरका स्थानीयबासी त्रसित बनेका छन् । घटनामा संलग्नहरूको खोजी भई रहेको र सुरक्षा व्यवस्था कडा पारिएको जिल्ला प्रहरी कार्यालयका डिएसपी यूवराज खड्काले बताए ।

मानबहादुर चौधरी