समाचारहरू

नेपालगञ्जस्थित गोल्डेन एबिसी विद्यालयमा अध्ययनरत मुस्लिम समुदायका बालिकालाई स्कूल पोशाक नलगाएको आरोपमा विद्यालय प्रवेशमा रोक लगाइएको विषयमा जिल्ला शिक्षा कार्यालयद्वारा विद्यालयले धार्मिक मर्यादा रहने गरी पोशाकको व्यवस्था मिलाउन जिल्लाका सामुदायिक तथा संस्थागत विद्यालयलाई परिपत्र गरेको छ ।

जिल्ला शिक्षा कार्यालय बाँकेद्वारा साउन २३ गतेको चलानी नम्बर १८८ को पत्र अनुसार विद्यालयले तोकेको रङ्गमा कुर्ता सुरूवाल लगाउन छुट दिई धार्मिक मर्यादा रहने गरी विद्यालय पोशाकको व्यवस्था मिलाउन परिपत्र गरिएको सहायक जिल्ला शिक्षा अधिकारी गोर्खबहादुर थापाले बताए ।

मुस्लिम बालिकालाई विद्यालय पोशाकमा कुर्ता सुरूवाल लगाएर आउँदा विद्यालयमा प्रवेश गर्न नदिएको विषयमा मदरसा इस्लामिया सङ्घ केन्द्रीय कार्यालय काठमाडौँले जिल्ला शिक्षा कार्यालयलाई पोशाकको समस्याले मुस्लिम बालिका विद्यालय छोड्न थालेको भन्दै समस्या समाधानका लागि पहल गरिदिन साउन २२ गते अनुरोध गरेको थियो ।

नेपालगञ्जस्थित गोल्डेन एबीसी विद्यालयमा अध्ययनरत मुस्लिम बालिकाहरू कुर्ता सुरूवालमा विद्यालय गएपछि विद्यालय प्रशासनले साउन १६ गते विद्यालयले 'तोकेको पोशाक लगाएर आउनु' भन्दै फर्काएको थियो । बालिकाहरूले दोस्रो दिनदेखि विद्यालयले तोकेको पोशाक लगाएर विद्यालय गएका थिए ।

विद्यालयका संस्थापक सदस्य विकासबहादुर सिंहले विद्यालयको अनुशासन र नियम कायम राख्न विद्यालयले तोकेको पोशाकमा आउने भनिएपनि जिल्ला शिक्षा कार्यालयले परिपत्र गरिसकेपछि परिपत्र अनुसार गर्ने बताए । घटनाको विषयमा साउन २६ गते राष्ट्रिय मानवअधिकार आयोग, इन्सेक र सिविनले छुट्टाछुट्टै अनुगमन गरेको थियो ।

विनोद पाण्डे