समाचारहरू

लेकवेशी नपा-६ मुलपानीस्थित माइतीमा बस्दै आएकी जाजरकोट छेडागाड नपा-५ की २० वर्षीया रामकली वादीलाई घरायसी विषयमा विवाद हुँदा वैशाख २३ गते हत्या गरेको आरोपमा प्रहरीले जाजरकोट छेडागाड नपा-५ का २४ वर्षीय भगत वादीलाई वैशाख २५ गते गिरफ्तार गरेको छ ।

सुर्खेतको लेकवेशी नपा-६ मुलपानीस्थित माइतीमा बस्दै आएकी २० वर्षीया रामकली वादीलाई घरायसी विषयमा विवाद हुँदा पतिले वैशाख २३ गते राति हँसियाले घाँटी रेटी हत्या गरेको माइती पक्षले आरोप लगाएका छन् ।

आरोपित भगतले पत्नीको हत्या गरेको स्वीकार गरेको इलाका प्रहरी कार्यालय छिञ्चुका सई मुन्नीसिंह चौहानले बताए ।

घटनाको अनुसन्धानमा खटिएका सई चौहानले भने-'हामी हत्या भएको कोठामा पुग्दा घाँटीदेखि तलको भाग मात्र थियो । घाँटी नै छुट्याएको अवस्थामा शव भेटियो ।'

भगतले सामान्य घरायसी खटपटका कारण रिसको झोकमा पत्नीको हत्या गरेको प्रहरीसमक्ष स्वीकारेको इलाका प्रहरी कार्यालय छिञ्चुले जनाएको छ । उनीहरूका दुई छोरी छन् । मजदुरी गर्न भारत गइरहने भगत कहिलेकाँही मात्र मुलपानीस्थित माइती घरमा रहेको परिवारलाई भेट्न आउने गर्थे ।

घटना सम्बन्धमा माइती पक्षले इलाका प्रहरी कार्यालय छिञ्चुमा वैशाख २४ गते उजुरी दिएका थिए । मृतकको पोष्टमार्टम क्षेत्रीय अस्पताल सुर्खेतमा वैशाख २५ गते भयो ।

दुर्गा थापा