समाचारहरू

सहीदभूमि गाउँपालिका–६ मा स्थगित मतदान जेठ २ गतेबाट जारी छ ।

मतदान प्रक्रियामा नेकपा एमाले र गठवन्धनका प्रतिनिधिबिच वैशाख ३० गते विवाद भएपछि स्थगित भएको मतदान सहीदभूमि गाउँपालिका–६ मा सुरु भएको छ ।

निर्वाचन अधिकृतको कार्यालय सहीदभूमिले ठाकुरदेवी माध्यमिक विद्यालय र ६ नं. वडा कार्यालयको तीन मतदान केन्द्रमा जेठ २ गते पुनः मतदान गर्ने निर्णय गरेको थियो ।

विवादको कारण वैशाख ३० गते बिहान साढे ११ बजे देखि मतदान प्रक्रिया रोकिएको थियो ।

अशक्त, असहाय, तथा ज्येष्ठ मतदाताहरूको तर्फबाट एउटै व्यक्तिले पटक–पटक मतदान गरेको विषयमा विवाद भएको थियो ।

विवाद सुरू भइ मतदान कार्य अवरूद्ध भएपछि सर्वदलीय बैठक राख्दा समेत बेलुकाको ५ बजेसम्म पनि विवादको निरूपण हुन सकेको थिएन ।

सहीदभूमि निर्वाचन कार्यालयले विवादकाबिच मतदान कार्य सञ्चालन गरे थप भौतिक क्षतिसमेत हुने निश्कर्ष निकालेर मतदान प्रक्रिया स्थगित गरेको थियो ।

तीन केन्द्रमा २ हजार ५ सय १३ जना मतदाता रहेका छन् ।

मतदान प्रक्रिया स्थगित हुनुपूर्व ८ सय १२ मत खसेको थियो ।

तीन ओटै केन्द्रमा पुनः नयाँ प्रक्रियाबाट मतदान भइरहेको निर्वाचन अधिकृत रुद्रमणि गिरीले बताउनु भयो ।

मतदान भएपछि मात्र एकै पटक सबै वडाको मतगणना गरिने निर्वाचन अधिकृत गिरीले बताउनु भएको छ ।

निर्वाचन आयोग र मुख्य निर्वाचन अधिकृतसँगको समन्वयमा गणनाको मिति तोकिने निर्वाचन अधिकृतको कार्यालयले जनाएको छ ।

ईश्वर थापा