समाचारहरू

आर्थिक अभावका कारण रैनादवी छहरा गाउँपालिका-३ भुवनपोखरीकी ३० वर्षीया भुमिका मरासिनी र उनका दुई छोराछोरी १२ वर्षदेखि शरीरमा गोलीको छर्रा लिएर बाँच्न बाध्य छन् । खर्च नहुँदा आफू सहित १४ वर्षीय छोरा पुष्कर र १३ वर्षीया छोरी पुष्पाको गालामा समेत गोलीका छर्राहरू रहेको भुमिकाले बताइन् ।

भुमिकाका अनुसार ०६२ फागुन १६ गते पाल्पा र अर्घाखाँचीको सिमाना तिनगिरेमा तत्कालिन विद्रोही पक्ष माओवादी र सरकारबिचको लडाँइका क्रममा सेनाको हेलिकप्टरले माथिबाट हानेको गोलीको छर्रा उनी र उनकै दुई जना छोराछोरीलाई लागेको थियो ।

'मेरा दुई ओटै गोडामा लागेको गोलीका छर्रा अझै निकाल्न सकेकी छैन । औषधि उपचारका लागि पैसा जुटाउन धेरै ठाउँमा हारगुहार गरेँ । कसैले पनि सहयोग गरेनन् ।'-उनले भनिन्-'त्यतिबेला म सुत्केरी भएको ९ महिना भएको थियो । सुत्केरी बस्न माइतीघर अर्घाखाँचीको खिदिम गएका बेला यस्तो घटना घट्यो । त्यसपछि रुँदैरुँदै घर फर्केँ ।'

गोलीको छर्रा निकाल्न धेरै प्रयास गर्दै काठमाडौँ र भारतसम्म पुगे पनि धेरै पैसा लाग्ने भएपछि उपचार गर्न नसकेको भुमिका बताउँछिन् । आफूले राहतको नाममा सरकारका तर्फबाट ४० हजार रुपियाँ मात्र पाएको भुमिकाले बताइन् ।

यज्ञमूर्ति तिमिल्सिना