द्वन्द्व पीडितका उजुरीहरूको प्रारम्भिक छानबिन सुरूः सदस्य सुवेदी

  ०७३ साउन ८ गते

सत्य निरूपण तथा मेलमिलाप आयोगमा परेका उजुरीहरूको प्रारम्भिक छानबिन सुरू भइसकेको सत्य निरूपण तथा मेलमिलाप आयोगका सदस्य श्रीकृष्ण सुवेदीले बताएका छन् ।

 

बर्दिया नागरिक समाज सञ्जालको आयोजनामा साउन ७ गते गुलरियामा आयोजित उजुरी छानबिन प्रक्रियामा सरोकारवालाको भूमिका विषयक कार्यक्रममा सदस्य सुवेदीले उक्त कुरा बताएका हुन् ।

 

आयोगमा परेका उजुरीहरूको गहिरिएर अनुसन्धान गर्नुपर्ने तथा सामान्य खालका उजुरी छुट्याएर अगाडि बढ्ने तयारी भएको सदस्य सुवेदीले बताए ।

 

उनले भने-'विस्तृत रूपमा अनुसन्धान गर्नुपर्ने घटनाका पीडित र आरोपित पक्षहरूसँग प्रत्यक्ष स्थानीय स्तरमा पुगी सूचना पुष्टि गर्न खोजी गरिने छ ।'

 

आयोगमा परेका उजुरीहरूको बारेमा तथ्य पत्ता लगाउन इन्सेकलगायत राष्ट्रिय तथा अन्तर्राष्ट्रिय संस्थाहरूले गरेको अभिलेखीकरण दस्तावेज र स्थानीय शान्ति समिति, जिल्ला प्रशासन कार्यालयमा परेका उजुरीहरू सबैलाई सूचनाको स्रोतको रूपमा प्रयोग गरिने आयुक्त सुवेदीले बताए ।

 

उक्त अवसरमा बेपत्ता पारिएका व्यक्तिको छानबिन आयोगले थप गरेको अवधिमा निवेदन दर्ता सम्बन्धित जिल्लाबाट गर्न मिल्ने व्यवस्था हुनुपर्ने द्वन्द्वपीडित समिति बर्दियाका अध्यक्ष भागिराम चौधरीले माग गरेका छन् ।

 

घटनाका बारेमा पीडितहरूको कुरा सुन्न र अनुसन्धान गर्न उनीहरूको स्थानीय भाषा लगायत हरेक विषयलाई ध्यान दिएर सोही अनुसारको व्यवस्था र तयारी गरी अगाडि बढ्ने सदस्य सुवेदीले जनाए ।


मानबहादुर चौधरी