समाचारहरू

बेपत्ता पारिएका नागरिकका परिवारलाई सरकारले रकम बाँडेर सहानुभूति देखाउनुभन्दा उनीहरूको पछिल्लो अवस्थाको बारेमा परिवारलाई जानकारी दिएमा मात्रै न्याय हुने द्वन्द्वपीडितहरूले बताएका छन् ।

बलपूर्वक बेपत्ता बनाउने कार्यविरुद्धको दिनको अवसरमा भदौ १४ गते कैलालीको धनगढीमा आयोजित अन्तरसम्वाद कार्यक्रममा बोल्दै कैलालीकी द्वन्द्वपीडित कृष्णा चौधरीले आफ्ना बोपत्ता पतिको अवस्था सार्वजनिक गरिदिन सरकारसमक्ष आग्रह गरिन् ।

घरमा कमाउन मान्छेको अवस्था अज्ञात भएको यतिका वर्षबितिसक्दा पनि अझै फर्किएर आउने आशा लाग्ने गरेको बताउँदै कृष्णाले सास वा लासको टुङ्गो लागेमात्रै पनि आफूहरूको पीडा कम हुने बताइन् ।

राष्ट्रिय मानव अधिकार आयोगको संयोजनमा सम्पन्न अन्तरसम्वाद कार्यक्रममा कैलालीका प्रमुख जिल्ला अधिकारी गोविन्द रिजाल, जिल्ला प्रहरी कार्यलय कैलालीका एसपी राजेन्द्र विष्टलगायतले बेपत्ता पारिएका व्यक्तिका बारेमा बेपत्ता पारिएका व्यक्तिको छानबिन आयोगले चाँडै सत्यतथ्य पत्ता लगाएर न्याय दिनुपर्ने बताएका थिए । त्यसैगरी धनगढीमा आयोजित अर्को कार्यक्रममा दिप प्रज्वलन गरी बेपत्ता पारिएका व्यक्तिको सम्झना गरिएको छ ।

सुमित्रा भट्टराई