समाचारहरू

जिल्लामा द्वन्द्वपीडितहरूका लागि विनियोजित रकम आर्थिक वर्षको अन्त्यमा पनि वितरण भएन । यसरी रकम वितरण हुन नसक्दा पीडितहरूले राहत तथा क्षतिपूर्ति पाउन सकेनन् भने विनियोजित रकम फ्रिज भएको छ ।

जिल्लामा विस्थापितहरूका लागि विनियोजित रकममध्ये २ करोड ४७ लाख ९५ हजार रुपैयाँ र मृतक तर्फको करिब १२ लाख रुपैयाँ वितरण वितरण हुन नसकेको जिल्ला प्रशासन कार्यालयले जनाएको छ । समयमा निवेदन प्राप्त नहुँदा र निवेदन दर्ता गर्नेहरू समेत रकम वितरण गर्ने बेलामा सम्पर्कमा नआउँदा राहत तथा क्षतिपूर्ति वितरणमा समस्या भएको प्रमुख जिल्ला अधिकारी विनोद कुमार खड्काले बताए ।

प्रभावकारी सूचना संप्रेशण नहुँदा पीडितहरूले समयमा निवेदन दर्ता गर्न नसेको गुनासो गरेका छन् । रकम वितरण गर्ने बेलामा मात्र सूचना संप्रेषण गरिएको थियो । स्थानीय तहको निर्वाचन पूर्व रकम वितरण गर्न कानुनी अप्ठ्यारो परेको हुनाले छोटो समयसीमामा सूचना प्रसार भएको स्थानीय शान्ति समितिका सचिव टंक पौडेलले बताए । सञ्चार माध्यमवाट सूचना प्रवाह गर्दा समेत पीडितहरू समयमा निवेदन दिन नआएको र हालसम्म पीडितहरूको यकिन विवरण समेत अद्यावधिक हुन नसकेको प्रमुख जिल्ला अधिकारी खड्काले बताए । जिल्लामा सर्वसाधारण बेपत्ता २ जना, मृतकमध्ये सर्वसाधारण १७१ र सेना प्रहरी १९ जना रहेका छन् ।

मंगल बेघा