समाचारहरू

सशस्त्र द्वन्द्वको क्रममा छोरा मारिएपछि मानसिक रूपमा कमजोर भएकी शुक्लागण्डकी नपा-१६ घारी तालवेशीकी ४१ वर्षीया चिना केसी अझै पनि उही समस्याबाट पीडित छिन् ।

नेपाल प्रहरीमा कार्यरत उनका जेठा छोरा कमल केसीलाई द्वन्द्वको क्रममा ०५८ सालमा तत्कालीन विद्रोही नेकपा माओवादीबाट रोल्पामा हत्या गरेपछि केसीको मानसिक अवस्था कमजोर भएको हो । त्यस यता उनको अवस्था झन बिग्रिएको परिवारले जनाएको छ ।

प्रहरीमा कार्यरत छोरालाई माओवादीले हत्या गरेपछि नै केसीको मानसिक अवस्था बिग्रिएको स्थानीय शालिग्राम सिग्देलले बताए । सिग्देलका अनुसार त्यस अगाडि भने केसी स्वस्थ थिइन् ।

छोरा मारिएपछि निकै पीडामा परेकी केसीमा लामो समयसम्म टोलाउने, त्यसपछि आफ्नै सुरमा बर्बराउने र आफ्नै सुरमा हिँड्ने जस्ता मानसिक समस्याहरू देखिएको सिग्देलले बताए ।

केसीका तिन छोराहरू मध्ये जेठा कमलको हत्या भएपनि दुई भाइ अझै नेपाली सेनामा कार्यरत छन् । दुवै छोराका पत्नीहरूले केसीको हेरचाह गर्दै आएका छन् ।

आफूलाई विवहा गरेर ल्याउँदा नै आमाको अवस्था यस्तै रहेको कान्छी बुहारी सीताले बताइन् । उनले सुने अनुसार पनि जेठो छोराको मृत्यु भएपछि केसीको मानसिक अवस्था बिग्रिएको हो ।

छोरा द्वन्द्वमा मारिएपछि राज्यको तर्फबाट पाउने राहत प्राप्त भएको र त्यसले आमालाई हेरविचार उपचारसमेत गरिएको सीताले बताइन् । तर, उपचारले केही प्रगति नभएको उनको गुनासो छ ।

प्रकाशचन्द्र भट्टराई