समाचारहरू

नेकपा एमालेले प्रहरी प्रशासनको मिलेमतोमा सत्ता गठबन्धन दलले निर्वाचनमा बुथ कब्जा गरेको आरोप लगाएको छ ।

एमालेले ०७९ मङ्सिर ५ गते विज्ञप्ति जारी गर्दै प्रमुख जिल्ला अपधकारी भोजराज खतिवडा र प्रहरी प्रमुख डिएसपी गंगा पौडेललेको प्रत्यक्ष मिलेमतो र योजनामा जिल्लामा बुथ कब्जाको घटना भएको आरोप लगाएको हो ।

नेकपा एमाले दोलखाका अध्यक्ष एवम् दोलखा क्षेत्र नम्बर १ मा प्रदेश सभाका उम्मेदवार नरबहादुर श्रेष्ठले विज्ञप्ति जारी गर्दै मतदान केन्द्र रणमैदान बन्दा समेत प्रहरी, प्रशासन मौन बसेको तथा प्रमुख जिल्ला अधिकारी खतिवडा र डिएसपी पौडेल स्वयम् गठबन्धनको बुथ कव्जामा सहयोगी बनेको आरोप लगाएका हुन् ।

एमालेले अघिल्ला निर्वाचनमा हिंसाग्रस्त भएको संवेदनशील बुथहरूमा गठबन्धनको तर्फबाट सिफारिस गरिएका मतदान अधिकृत खटाउने काममा सेटिङ भएको र सेटिङको आधारमा डिएसपी पौडेलले ति बुथहरूमा प्रहरी इन्चार्ज खटाएको आरोप लगाएको छ ।

भुषाफेदा, कालिञ्चोक, भेड्पुको जुकेपानी, वैतेश्वर गाउँपालिकाको १, ३ र ६ मा बुथ कब्जा हुँदा प्रशासन मौन बसेको तथा प्रमुख जिल्ला अधिकारी खतिवडा र डिएसपी पौडेलले आफ्नो पदिय अधिकारको समेत दुरुपयोग गरेको एमालेको विज्ञप्तिमा उल्लेख छ ।

मतदातालाई मतदानस्थलमा कुटपिट गरी लखेटेर बुथ कब्जा गरेर लोकतन्त्र र गणतन्त्रको उपहास गर्दै निर्वाचनलाई सत्ताको आडमा घिनलाग्दो बनाएको एमालेको विज्ञप्तिमा उल्लेख छ ।

बुथकव्जा भएको मतपत्र भुईमा छरिएको, एकलौटी भोट हालिरहेको दृश्य र तस्वीरहरूलाई एमालेले सुरक्षा प्रमुखहरूलाई पठाउँदा पनि बेवास्ता गरेको र माथिल्लो निकायमा झुठो विवरण सम्प्रेषण गरेर प्रजिअ र डिएसपीले पदिय अधिकार दुरुपयोग गरेको एमालेको आरोप छ ।

एमालेले दोलखाका मुख्य निर्वाचन अधिकृतप्रति पनि असन्तुष्टि जनाएको छ । मतदानको दिन दोलखाका मतदानास्थलहरूमा बुथकव्जा, ढुङ्गामुडा र गुण्डागर्दीको घटनाका बारेमा मुख्य निर्वाचन अधिकृतलाई सबै जानकारी भए पनि सो घटनामा कुनै निर्णय नलिई मौना साँधेको एमालेको आरोप छ ।

एमालेले बुथ कव्जा भएका मतदान केन्द्रमा पुनः मतदान गराउन माग पनि गर्दै चरिकोटस्थित मतगणना स्थल गौरीशंकर बहुमुखी क्याम्पस अगाडि नाराबाजी गर्दै विरोद प्रदर्शन गरेको छ ।

उद्धव पोखरेल