समाचारहरू

नेपाल सरकारले उपलब्ध गराउँदै आएको दैनिक ४५ रुपियाँ र सातसय ग्राम चामलले बाँच्नै गाह्रो भएको पर्वत जिल्ला कारागारका कैदीबन्दीहरूले गुनासो गरेका छन् ।

इन्सेकले पुस ७ गते गरेको कारागार अनुगमनका क्रममा कैदीबन्दीका नाइके ५९ वर्षीय गोविन्द क्षेत्री भन्छन्-'दैनिक रूपमा चाहिने दाल, तरकारी, चिनी, चियापत्ति जस्ता चिजहरू किन्नका लागि ४५ रुपियाँले सम्भव नै छैन । तर, हामीसँग अरु उपाय छैन । यसैबाट जीवन जीउन बाध्य छौँ ।'

लेखफाँट-३ घर भई हाल कारागारमा रहेर सजाय भुक्तान गरिरहको २९ वर्षीय विनोद सुवेदीले पनि थोरै भत्ताले गर्दा गुजारा चलाउन निकै कठिन भएको गुनासो गरेका थिए । अधिकांश बन्दी कैदीहरूको एउटै गुनासो थियो-'सरकारले दिने गरेको न्यून भत्ताले गुजारा चलाउन धौ धौ परिरहेको छ ।'

पुरुष ५० जना र महिला १० जनाको क्षमता रहेको पर्वत जिल्ला कारागारमा हाल महिला सात जना र पुरुष ६८ जना रहेका छन् । अवलोकनका क्रममा जेलभित्र पानी, बत्तिको राम्रो व्यवस्था गरिएको, खेलकुदका सामग्रीहरू तथा सानो पुस्तकालयको समेत व्यवस्था गरिएको देखियो ।

तर, पुस्तकालयमा नयाँनयाँ पुस्तकहरू नआउने भएकोले एउटै पुस्तक दोहोर्‍याई तेहर्‍याई पढ्दा आफूहलाई दिक्क लाग्ने गरेको कैदीबन्दीले गुनासो गरे । त्यसैगरी कैदी बन्दीहरूलाई सुत्न तथा बस्नका लागि पनि खासै समस्या रहेको देखिएन । जेलभित्र रहेका कैदी बन्दीहरू मध्ये अधिकांशले विभिन्न सीपमूलक तालिम लिएर मुढा बनाउने, कपडा सिलाउने, स्वीटर बुन्ने जस्ता आयमूलक कामहरू गरिरहेका छन् ।

किशोर सापकोटा