समाचारहरू

पर्वतको एक मात्र दृष्टिविहिन बालबालिका अध्ययनरत शिवालय माविका विद्यार्थीहरू विद्यालयले सञ्चालन गरेको अनलाइन शिक्षाबाट वञ्चित बनेका छन् । विद्यालयले सञ्चालन गरेको दृष्टिविहिन स्रोत कक्षामा अध्ययनरत १८ जना दृष्टिविहिन बालबालिका अनलाइन शिक्षा लिन पाएका छैनन् ।

 लामो समयदेखि कोभिड–१९ का कारण विद्यालय शिक्षा बन्द भएपछि विद्यालयले अनलाइन विधि मार्फत पठनपाठन शुरू गरेपनि दृष्टिविहिन बालबालिकाहरूको पहुँचमा पुग्न सकेको छैन । ‘अनलाइन कक्षामा दृष्टिविहिन बालबालिकालाई समेट्न नसक्दा समस्या भएको छ ।’– विद्यालयका प्रधानाध्यापक भुपेन्द्र चापागाईले भन्नुभयो– ‘दृष्टिविहिन बालबालिकाहरूमा सञ्चार प्रविधिको सहज पहुँच नहुँदा समस्या भएको छ ।’

 छात्रावासमा बसेर अध्ययन गर्दै आएका १८ जना बालबालिका अहिले कोभिड –१९ कै कारण घर फर्केका छन् । दृष्टिविहिन स्रोत कक्षामा अहिले पर्वत सहित म्याग्दी, बागलुङ, तनहुँ र गुल्मीका विद्यार्थीहरू रहेका छन् ।

 विद्यालयमा अध्ययन गर्ने सबैजसो बालबालिकाको पारिवारिक आर्थिक अवस्था न्यून रहेका कारण दैनिक जसो मोबाइलमा रिचार्ज गरेर पठनपाठनमा सहभागी हुने अवस्था नरहेकाले समस्या भएको  प्रधानाध्यापक चापागाईले जानकारी दिनुभयो ।

 विद्यालयले समय समयमा सम्पर्क गरेपनि अनलाइन कक्षामा सहभागी गराउन नसकिएको दृष्टिविहिन स्रोत कक्षाका शिक्षक हरिदत्त शर्माले बताउनुभयो ।

 ‘फोन गरेर अनलाइन कक्षामा सहभागी हुन आग्रह गर्दा मोबाइलमा पैसा नभएको गुनासो गर्छन् ।’– शिक्षक शर्माले भन्नुभयो– ‘विद्यालयले उनीहरूलाई रिचार्ज गरेर पठनपाठनमा सहभागी गराउने अवस्था छैन ।’

 विद्यालयमा कक्षा ९ मा अध्ययनरत पर्वतको महाशिला गाउँपालिका– ५ लुंखुका होमबहादुर क्षेत्रीले आफूसँग पैसा नभएका कारण अनलाइन कक्षामा पढ्न नसकेको गुनासो गर्नुभयो ।

 ‘घरमा मोबाइलमा रिचार्ज राख्ने पैसा पनि छैन।’–उहाँले भन्नुभयो– ‘अनलाइन कक्षामा पढ्न सरहरूले भन्नुहुन्छ तर इन्टरनेट चलाउनका लागि मोबाइलमा राख्ने पैसा हुँदैन ।’

 नगरपालिकालाई दृष्टिविहिन विद्यार्थीलाई पठनपाठनका लागि सहयोग गरिदिन आग्रह गर्दा पनि कुनै सुनुवाइ नगरेको प्रअ चापागाईले बताउनुभयो ।

विशेषत नगर शिक्षा शाखाले दृष्टिविहिन विद्यार्थीहरूका लागि आवास खर्च स्वरूप प्रतिव्यक्ति मासिक चार हजार रुपिँया प्रदान गर्दै आइएको थियो ।

कोरोना सङ्क्रमणका कारण विद्यार्थीहरू छात्रवासबाट बाहिरिएपछि नगर शिक्षा शाखाबाट मासिक रूपमा प्राप्त हुने रकम समेत रोकिएको छ ।

 ‘लकडाउनका कारण विद्यालय बन्द भएपछि उक्त रकम नपठाएका हौँ ।’– कुश्मा नगरपालिका नगर शिक्षा शाखा अधिकृत विष्णु तिवारीले भन्नुभयो–‘छात्रावासमा नै विद्यार्थी नभएपछि वैशाखदेखि हालसम्म उक्त रकम पठाएका छैनौ।’उनले विद्यालय सञ्चालनमा आएपछि मात्रै रकम पठाइने बताउनुभयो ।

सन्तोष थापा