दुर्व्यवहार घटनाका आरोपित गिरफ्तार

  ०७८ कात्तिक २६ गते

२८ वर्षीया महिलालाई दुर्व्यवहार गरेको आरोपमा प्रहरीले छायाँनाथ रारा नगरपालिका-५ का दुईजना युवालाई कात्तिक २२ गते गिरफ्तार गरेको छ ।

२३ वर्षीय जयकिसन रोकाया र २१ वर्षीय जिविस नेपालीले कात्तिक २१ गते राति ९ बजे हात पात गरी बलात्कार प्रयास गरेको भन्दै पीडितले कात्तिक २२ गते जिल्ला प्रहरी कार्यालयमा उजुरी दिएपछि आरोपितलाई गिरफ्तार गरेको जिल्ला प्रहरी कार्यालयका डिएसपी चित्रबहादुर भट्टराईले बताउनुभयो ।

आरोपितहरूले कात्तिक २१ गते शरिरमा लगाएको लुगा च्यातेर बलात्कार प्रयास गरेको र छातिमा दुबै जनाले मुक्का हानेको साथै गहना समेत लिएको पीडितले इन्सेक प्रतिनिधिलाई बताउनुभयो ।

पीडितले बलात्कार प्रयास भएको उजुरी दिए पनि घटनाको अवस्था हेर्दा दुर्व्यवहार भएको देखिएकोले सार्वजनिक स्थलमा दुर्व्यवहार सम्बन्धी मुद्दा दर्ता भएको डिएसपी भट्टराईको भनाइ छ ।

पीडित महिलाको स्वास्थ्य परीक्षण कात्तिक २२ गते जिल्ला अस्पतालमा सम्पन्न भएको डाक्टर अर्जुन भामले जानकारी दिनुभयो ।


जीवन सेजुवाल