समाचारहरू

४४ वर्षीया महिलालाई सामाजिक सञ्जालमार्फत दुर्व्यवहार गरेको आरोपमा सिराहाको लहान नगरपालिका-२४ घर भई हाल काठमाडौँ बस्दै आएका ३६ वर्षीय मनोज मानव भन्ने मनोज कुमार महतोलाई प्रहरीले ०८० कात्तिक २२ गते काठमाडौँबाट गिरफ्तार गरेको छ ।

आरोपितले युट्युव, फेसवुक र टिकटक लगायत सामाजिक सञ्जालमा आफ्ना फोटो र आवाज दुरुपयोग गरेर भिडियो बनाई अपलोड गरेर चरित्रहत्या गरेको भन्दै पीडित महिलाले कात्तिक २० गते प्रहरी प्रधान कार्यालयको साइवर ब्युरो, भोटाहिटीमा उजुरी दिनुभएको थियो ।

पीडितको उजुरीका आधारमा आरोपितलाई कात्तिक २२ गते काठमाडौँबाट गिरफ्तार गरेको नेपाल प्रहरीको साइवर ब्युरो, भोटाहिटीका प्रवक्ता डिएसपी पशुपति कुमार रायले बताउनु भयो ।

ब्युरोले जिल्ला अदालतबाट कात्तिक २२ गते सात दिनको म्याद थप गरी आरोपितलाई हिरासतमा राखेर अनुसन्धान गरिरहेको डिएसपी रायले इन्सेकलाई जानकारी दिनुभयो ।

विमल पौडेल