दुर्व्यवहार घटनाका आरोपित गिरफ्तार

१६ वर्षीया बालिकालाई सामाजिक सञ्जालमार्फत दुर्व्यवहार गरेको आरोपमा डोटीको दिपायल सिलगढी नगरपालिका-१३ का ३२ वर्षीय पदम बहादुर खड्कालाई प्रहरीले ०८० जेठ ११ गते गिरफ्तार गरेको छ ।

फेसवुकको दुरुपयोग गरी बालिकाको चरित्रहत्या गरेको भन्दै पीडित पक्षले जेठ १० गते प्रहरी प्रधान कार्यालयको साइवर ब्युरो, भोटाहिटीमा उजुरी दिएका थिए ।

आरोपितले पीडितको फेसवुक आइडीमा रहेका तस्विर डाउनलोड गरेर सम्पादन गर्दै अश्लिल भिडियो बनाएर विभिन्न सामाजिक सञ्जालमा अपलोड गर्ने गरेको र आफूले भने अनुसार नगरे भिडियो भाइरल गरिदिने भन्दै धम्की दिने गरेको नेपाल प्रहरीको साइवर ब्युरो भोटाहिटीका प्रवक्ता डिएसपी पशुपति कुमार रायले बताउनु भयो ।

ब्युरोले जिल्ला अदालतबाट जेठ १२ गते पाँच दिनको म्याद थप गरी आरोपितलाई हिरासतमा राखेर अनुसन्धान गरिरहेको डिएसपी रायले बताउनु भयो ।


विमल पौडेल