दुर्गा प्रसाईंको आन्दोलनमा सहयोग गरेको आरोपमा दुई जना गिरफ्तार

  ०८० मङ्सिर १२ गते

मेडिकल व्यवसायी दुर्गा प्रसाईंले नेतृत्व गर्दै आइरहनु भएको ‘राष्ट्र, राष्ट्रियता, धर्म, संस्कृति र नागरिक बचाउ महाअभियान’ को समर्थन गरेको आरोपमा प्रहरीले ०८० मङ्सिर १२ गते दुई जनालाई गिरफ्तार गरेको छ । प्रहरीले प्रसाईंको आन्दोलनमा सहभागी भएको र सहयोग गरेको आरोपमा उनीहरूलाई गौशाला क्षेत्रबाट गिरफ्तार गरेको हो ।

प्रहरी गिरफ्तारीमा पर्नेहरूमा काठमाडौँका ७७ वर्षीय ‘गुरु’ तीलक अधिकारी र काठमाडौँका ५० वर्षीय सानु पुर्वाछाने मगर रहेका छन् । प्रहरी गिरफ्तारीमा परेका मगर प्रसाईंको आन्दोलनका यातायात व्यवस्थापक एवम् मधेश प्रदेशका संयोजक समेत रहेका छन् ।

जिल्ला प्रहरी परिसर, काठमाडौँका प्रवक्ता एसपी कुमोद ढुङ्गेलका अनुसार गिरफ्तारीमा परेका दुवै जनालाई प्रहरी वृत्त, गौशालामा राखिएको छ ।

यसअघि मङ्सिर ११ गते प्रसाईंको आन्दोलनमा प्रहरीमाथि ढुङ्गामुढा गरेको आरोपमा प्रहरीले हिन्दु धर्मगुरु आचार्य श्रीनिवास र प्रसाईंका स्वकीय सचिव विनञ्जय थापा सहित १५ जना समर्थकलाई समेत गिरफ्तार गरेको थियो ।


विमल पौडेल