समाचारहरू

स्वास्थ्य चौकीमा उपचारका लागि आउने बिरामीलाई टुकीकै भरमा उपचार गर्नुपर्ने बाध्यता रहेको छ । स्वास्थ्य जस्तो संवेदनशील क्षेत्रमा सोलारको व्यवस्था नभएपछि सेवाग्राही र कर्मचारीले सस्ती खेप्नु परेको छ ।

रातीको समयमा आउने सुत्केरी तथा अन्य आकस्मिक उपचारका लागि आउने बिरामीलाई टुकी बालेर उपचार गर्नुपर्ने बाध्यता रहेको स्वास्थ्यकर्मीले गुनासो गर्दै आएका छन् ।

स्वास्थ्य चौकीमा विद्युत आपूर्ति गर्दै आएको हिल्दुम साना जलविद्युुत आयोजनाको विद्युत सेवा ११ दिनदेखि बन्द भएपछि स्वास्थ्यकर्मीलाई टुकी बालेर उपचार गर्नु परेको हो ।

सिमकोट गाउँपालिका–७ को डाँडाफया स्वास्थ्य चौकीका वरिष्ठ अनमि रमिता रोकायाले विद्युत् नभएपछि हाल दैनिक रूपमा रातीको समयमा टुकी बालेर बिरामीको उपचार गर्नुपरिरहेको गुनासो गर्नु भयो । हिल्दुुम विद्युत वितरण केन्द्रको विद्युत असोज १७ गतेदेखि अवरुद्ध हुँदै आएपछि स्वास्थ्य चौकीलाई यो बाध्यता आइलागेको हो । उहाँले लगातार वर्षा भएको कारण सल्लोको दियालो बालेर उपचार गर्न नसकिने भएपछि टुकी बालेर उपचार गर्ने कार्य भइरहेको बताउनुभयो ।

स्वास्थ्यकर्मीलाई रातीको समयमा विशेष गरी सुत्केरी र अन्य इमरजेन्सी बिरामीको उपचारमा समस्या हुने गरेको छ । स्वास्थ्य चौकीमा सोलारको व्यवस्था नहुँदा विद्युत् नभएको बेला अन्य विकल्पबाट उज्यालो गर्न सकिने अवस्था छैन । इन्भर्टर लगायतका वैकल्पिक व्यवस्था गर्न सेवाग्राहीले सरकारसँग माग गरेका छन् । यो समस्या सिमकोट र खार्पुनाथ गाउँपालिका मात्रै नभई अन्य सात वटा गाउँपालिकाका स्वास्थ्य चौकीमा पनि देखिएको स्वास्थ्य सेवा कार्यालय हुम्लाका प्रेमबहादुर सिंहले बताउनु भयो ।

विद्युत अवरुद्धले असोज २६ गते मात्रै सिमकोट गाउँपालिका–७ डाँडाफया स्वास्थ्य चौकीमा एक जना महिलाको टुकि बालेर सुत्केरी गराउनु परेको डाँडाफया स्वास्थ्य चौकीका इन्चार्ज सन्तोष बोहराले बताउनु भयो ।

नन्द सिंह