समाचारहरू

दुई हप्तादेखि अदानचुली गाउँपालिका–२ र ३ श्रीगरमा खानेपानीको समस्या भएको छ । कतै वर्षा र कतै स्काभेटरले सडक खन्ने क्रममा भत्केका कारण खानेपानी लाइनको पाईपमा क्षति पुर्‍याएपछि जेठ २८ गतेदेखि दुई ओटा वडाका स्थानीय नागरिक खानेपानीबाट बञ्चित भएका हुन् ।

करीब ९ किलो मिटर टाढाबाट ल्याएको खानेपानीमा समस्या आएपछि गाउँका धाराहरु रित्तो बनेको अदानचुली गाउँपालिका–२ का स्थानीय भारमल बुढाले बताउनु भएको छ । स्थानीय बुढाका अनुसार धारामा पानी नआएपछि गाउँभन्दा करिब आधा घण्टा समय लाग्ने सिलङगी भन्ने स्थानमा पुगेर इनारको पानी तानेर पिउनुपर्ने बाध्यता छ ।

सो ठाउँको पानी पनि लाइनमा बसेर भर्नु पर्ने अवस्था रहेको सोही ठाउँका अर्का स्थानीय टिकाबहादुर मल्लले गुनासो गर्नु भएको छ । स्थानीय नागरिकहरूका लागि लाइन बसेर पानीको जोहो गर्नु पर्ने भए भएको स्थानीय मल्लको भनाइ छ ।

त्यसै गरी गाउँभरी पानीको अभाव भएपछि वडा–२ स्थित सुर्यादय माध्यमिक विद्यालयका विद्यार्थी पनि हाल सोही ठाउँको एक होटेलमा गएर पानी पिउने गरिरहेका छन् । खानेपानीकै लागि विद्यालयबाट करिब आधा घण्टा टाढा रहेको मुलमा पुगेर पानी पिउनु पर्ने बाध्यता पनि रहेकोे विद्यालयका प्रधानाध्यापक सुरविर शाहीले बताउनु भएको छ ।

खाने पानीको पाइप लाइनलाई मर्मतका लागि स्थानीय र चौकीदार नियमित रुपमा काम गरिरहेको भएपनि सम्पन्न हुन नसकेको चौकीदार हेलु भण्डारीले बताउनु भएको छ । एक वर्ष पहिले पनि सडक निर्माणको क्रममा ठाउँठाउँमा पाईप चुँडिएपछि समस्या बनाएको थियो ।

खानेपानीको समस्याका विषयमा अदानचुली गाउँपालिकाका अध्यक्ष मोहन विक्रम सिंहलाई बुझ्दा यो समस्या हल गर्नका लागि स्थानीय र चौकीदारहरूले नियमित रुपमा काम गरिरहेका छन् । कामदारलाई गाउँपालिकाले ज्यालाका लागि केही रकम उपलब्ध गराउने बताउनु भएको छ ।

नन्द सिंह