समाचारहरू

नाम्खा गाउँपालिका-२ को सत्य प्राथमिक विद्यालय लामा खोल्सीमा कार्यरत शिक्षक नहुँदा उक्त विद्यालयको पठनपाठन असार २० गतेदेखि प्रभावित भएको छ ।

विद्यालयमा शिक्षक नहुँदा दुई हप्तादेखि बन्द विद्यालय साउन ३ गतेसम्म खुल्न नसकेको स्थानीयबासी पेमा हिसे लामाले गुनासो गरे ।

विभिन्न कामको बाहनामा शिक्षक सिमकोटलगायत विभिन्न ठाउँमा जाने गरेको हँदा विद्यार्थीको पठनपाठन प्रभावित भएको लामाले गुनासो गरेका हुन् । सो विद्यालयमा दरबन्दीमा दुई जना र राहतबाट दुई जना शिक्षक रहेको विद्यालयमा यतिखेर एक जनापनि शिक्षक नभएपछि विद्यालयमा ताला लागेको छ ।

विद्यालय बन्द हुँदा करिब ५५ जना बालबालिकाको पठनपाठन प्रभावित भएको विद्यालय व्यवस्थापन समितिका सदस्य ठोक्याल लामाले बताए । लामो समयसम्म शिक्षक विद्यालयमा हाजिर नभएको सदस्य लामाले बताएका छन् ।

जिल्ला शिक्षा अधिकारी मदनकुमार थापाले यस विषयमा आफूलाई कुनै जानकारी नआएको बताए । यस विषयमा बुझेर कारबाहीको प्रकृया अगाडि बढाउने जिशिअ थापाले प्रतिबद्धता जनाए ।

नन्द सिंह