समाचारहरू

दुई हप्तादेखि अवरुद्ध विद्युत सेवा सुचारु नहुँदा के.आइ.सिंह गाउँपालिका–३ बासुदेबि दल्ल गाउँका करिब ४ सय घरपरिवारले समस्या झेल्नु परेको छ ।

विद्युत सेवा अवरुद्ध भएको दुई हप्ता वितिसक्दा समेत नेपाल विद्युत प्राधिकरण र स्थानीय सरकारले कुनै चासो नदेखाएका कारण आफूहरुले सास्ती खेप्नु परेको स्थानीयहरुले गुनासो गर्नु भएको छ ।

भदौ ५ गते आएको हावाहुरीले स्थानीय दल्ल विद्युत ट्रान्समिटरमा समस्या आएपछि विद्युत सेवा अवरुद्ध हुँदै आएको हो ।

विद्युत अवरुद्ध हुँदा साँझ बिहान घरायसी काम गर्न र बालबालिकाहरुको पढाइमा समेत समस्या हुने गरेको दल्ल गाउँकी स्थानीय ३५ वर्षीया लक्ष्मीदेवी ऐरले गुनासो गर्नु भयो ।

उहाँले दुई हप्ता वितिसक्दा समेत बिजुलि मर्मत गरी जनतालाई सेवा दिन नसक्ने सरकारबाट नागरिकले ठुलो अपेक्षा राख्न नसकिने बताउनु भयो ।

विद्युत प्राधिकरण दिपायल शाखालाई विद्युत अवरुद्ध बारेमा पटक पटक जानकारी गराउँदा समेत सुनुवाइ हुन नसकेको स्थानीय तारासिंह ऐरले बताउनु भयो ।

विद्युत सेवा उपलब्ध गराए वाफत राज्यले आफूहरुबाट कर लिदै आएको भएपनि विद्युत अवरुद्ध भएको समयमा कुनै चाँसो नदिनु नागरिकप्रति राज्यको गैरजिम्मेवार पन भएको स्थानीय ऐरको भनाइ छ ।

विद्युत अवरुद्धका कारण पढाइ लेखाइमा समेत समस्या भएको बासुदेवी माध्यमिक विद्यालयमा कक्षा ८ मा अध्ययनरत छात्रा लक्ष्मी बिकले गुनासो गर्नु भयो ।

उहाँले भन्नु भयो– ‘दुई घण्टा विद्यालय आउन जान लाग्छ ।  घरमा अलिअलि घरायसी काम हुन्छ । साँझपख गृहकार्य गर्दा बत्ती हुदैन । आज आउँछ, भोली आउँछ भन्दा भन्दै १५ दिन वितिसक्यो । बिजुली आउने अत्तोपत्तो छैन् ।’

विद्युत प्राधिकरण दिपायल शाखाका के.आइ. सिंह फिल्ड सुपरभाइजर उत्तमबहादुर राणाले नयाँ ट्रान्समिटर गाउँपालिकामा आइ सकेकाले एक /  दुई दिन भित्रै विद्युत सुचारु हुने बताउनु भयो ।

ट्रान्समिटरमा आएको खराबीका कारण भदौ ५ गतेदेखि विद्युत अवरुद्ध भएपछि स्थानीयले समस्या झेल्नु परेको बताउनु भयो ।

उहाँले नयाँ ट्रान्समिटर गाउँपालिकामा ल्याउने काम भइसकेको अवरुद्ध भएको विद्युत सेवा एक / दुई दिन भित्रै सुचारु हुने बताउनु भयो ।

गणेश जोशी